भारत माता की जय

भांगरभूंय | प्रतिनिधी

दरवर्सा आमी आमच्या देशाचो स्वतंत्रताय दीस उमेदीन मनयतात. आंगणवाडी, मुळाव्यो शाळा, हायस्कूलां, काॅलेजी, सरकारी कार्यालयांनी हो दीस साबार कार्यावळींनी जाता. सरकारी पांवड्यारुय तो मनयतात. ह्या दिसा देश स्वतत्र करपाक आपलो जीव दिल्ल्या हुतात्म्यांक, राष्ट्रपुरुसाक आर्गां ओंपतात. तांची याद करतात. 

ह्या दिसा सकाळीं शाळा आनी हेर कडेन तिरंगो उंच चडयतात. ताका फुलांचे हार ओंपतात. राष्ट्रगीत गावन मानवंदना दितात. ह्या वेळार शाळांतले विद्यार्थी, पुलीस बँड पंगडा सयत बावट्याक सलामी दितात. भारत माता की जय, वंदे मातरम अश्या घोशणांनी वाठार दुमदुमून वता. सगल्यांक सुटी आशिल्ल्यान जण एकलो खंय बावटो हुबयतात, त्या जाग्यार मुजरत हाजीर रावतात. तातूंत स्वता वांटेकार जातात. लोकांनी हें स्वातंत्र्य मेळोवपाक हड्ड्याचेर बंदुकीच्यो गुळयो घेतल्यो. थोडे देशा खातीर रणांगणाचेर शहीद जाले. 

भारत आमचो देश, आमी ताचे नागरीक अशें आमी म्हणीत आयल्यात. बावटो हुबोवपाक फांतोडेर उठून वतात. राष्ट्रभक्तीचीं गीतां आयकतात. ह्या दिसा दिल्लींत, राजधानी पणजे पुलीस  दळ, एनसीसी, लश्कराच्या कवायती जातात. त्यो मेळप लोकांचें राष्ट्रप्रेम जागृत जाता. जसो दीस सोंपलो काय सगलो संवसार शांत जाता. आतां प्लास्टिकाच्या बावट्याची क्रेझ आयल्या. कांय जाण कागदी बावटे सायकल, दुचाकी, बशी, गाडयांक लावन भोंवतात. ल्हान भुरग्याच्या हातांत बावटे दिसतात. मात सांज जातकच ते रस्त्यार पडिल्ले दिसतात. तें पळोवन मन दुखी जाता. 

सांगपाची गजाल म्हणल्या झेंडावंदना वेळार सावधान स्थितींत उबें रावन ताका मानवंदना दिवप आमचें कर्तव्य. खंयूय राष्ट्रगीत सुरू आसल्यार एकाच जाग्यार उबें रावप. चलप ना. रस्त्याचेर तिरंगो पडला जाल्यार तो उखलप ही जण एकल्याची जबाबदारी. 

भारत जरी स्वतंत्र जालो तरी देशांतली गरिबी, भ्रश्टाचार, बायलांक दिल्ली वागणूक, अत्याचार, फटींगपणा, सुवार्थ, दुसऱ्यांचो दुस्वास, खून, बालमजुरी, मारामारी, शोशणबंद जावंक ना. समाजांत घडपी असल्या घडणुकांचेर आमी बारीक लक्ष दवरूंक जाय. कितेंय दुबावीत दिसल्यार पुलिसांक सांगपाक जाय. ते तुमचें नांव गुपीत दवरता. आमी स्वतंत्र भारताचे नागरीक म्हूण समाजात मिरयतात. मात समाजांतल्या वायट घडणुकां कडेन आडनदर करतात. वाठार नितळ दवरप, ज्येश्ठ नागरिकांक मजत करप, सप्तकांतल्यान एक दीस तरी समाजकार्य करप, अडिल्ल्यांक मजतीचो हात दिवप हें आमचें कर्तव्य. 

चलात तर स्वतंत्रताय दिसाचे पूर्वसंध्येक समाज सुदारपाचो, कायदो पाळपाचो सोपूत घेवया. भारत माता की जय.

– सिद्धी तिळवे