भांगरभूंय | प्रतिनिधी
भारताच्या ज्युनियर दादल्यांच्या हॉकी पंगडान सुल्तान जोहोर करंड हॉकी सर्तीचे आपले निमाणे रावंड रॉबीन लीग मॅचींत ग्रेट ब्रिटनाक 5-5 असो बरोबरींत आडावन स्वताक फायनलींत सुवात मेळोवपाचे सर्तींत आपलें आव्हान कायम दवरलें.
भारता वतीन पुवन्ना सिबी (सातवें मिनट), अमनदीप (50वें मिनट), अरिजीत सिंग हुंदल (53वें मिनट) आनी शारदा नंद तिवारी (56वें आनी 58वें मिनट) हांणी गोल केले. ग्रेट ब्रिटना वतीन मॅक्स अॅण्डरसन (पयलें आनी 40वें मिनट), हॅरिसन स्टोन (42वें मिनट) आनी जामी गोल्डन (54वें आनी 56वें मिनट) हांणी गोल केले.
भारतान रावंड रॉबिनांतल्या आपल्या अभियानांत पांच मॅचींतल्यान आठ गुणां सयत सोंपयलें. सध्या तो ऑस्ट्रेलिया पंगडा उपरांत दुसरे सुवातेर आसा. ऑस्ट्रेलियेचे चार मॅचींतल्यान 10 गूण जाल्यात आनी तो फायनली खातीर पात्र थारला. सध्याचो वस्ताद ग्रेट ब्रिटनाचें फायनलींत पावपाचें आव्हान पयलींच सोंपला. ताचे पांच मॅचींतल्यान सात गूण आसात. दक्षीण आफ्रिकेचे चार मॅचींतल्यान स गूण आसात. आफ्रिकेचो पंगड ऑस्ट्रेलियेक हारयता जाल्यार ताची फायनलींतली सुवात निश्चीत जातली. आनी भारताचें आव्हान सोंपतलें.
दक्षीण आफ्रिकेचें गोल अंतर भारता परस बरें आसा. ब्रिटना आड भारतान पयलींच गोल घेतलो. पूण, पयल्या क्वॉर्टरांत 1-1 अशी बरोबरी सादपाक येसस्वी थारलो. मध्यांतरा उपरांत स्कोरांत कांयच फरक पडूंक ना. उपरांत ब्रिटनान आघाडी घेतली. पूण, भारतान निमाण्या क्वॉर्टरांत येसस्वी रितीन पुनरागमन केलें. चवथ्या आनी अखेरच्या क्वॉर्टरांत गोलांचो पावस पडलो. ह्या क्वॉर्टरांनी स गोल जाले. भारतान आठ मिनटां भितर चार गोल केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
