भांगरभूंय | प्रतिनिधी
नवी दिल्ली, खबरां संस्था ः दिवाळेच्या निमतान केंद्र सरकार एक व्हड निर्णय घेतलें. गरीब आनी मध्यमवर्गीय लोकांक सवलतीच्या दरांत अन्नधान्य आनी हेर गरजेचीं वस्तू दिवपा खातीर सरकारान भारत ब्रँडाची निर्मिती केल्ली. दिवाळेच्या वेळार गिरायकांक म्हारगायेचो फटको बसचो न्हय म्हणून आतां सरकार रिलायन्स रिटेल कडेन उलोवणी करता. हें येसस्वी जाल्यार भारत ब्रँडाच्यो वस्तू रिलायन्स रिटेल स्टोरांनी अनुदानीत दरान विकतले. भारत ब्रँडाच्यो वस्तू खाजगी वितरका वरवीं केंद्र सरकारान विकपाची ही पयलेच खेपेची गजाल.
भारत ब्रँड पीठ, तांदूळ आनी दाळ फावो त्या दरांत विकता. हाचे आदीं रिलायन्स जियो मार्ट, अमेझॉन आनी बिगबास्केट अशा ई-कॉमर्स सायटांचेर कांय काळा खातीर भारत ब्रँडाची विक्री केल्ली. पूण आतां रिलायन्स रिटेल कडेन दीर्घ काळा खातीर कबलात केल्या. केंद्र सरकारा कडेन आशिल्लो राखीव स्टॉक रिलायन्स रिटेलांत अनुदानीत दरान विक्री खातीर दवरतले. ते भायर रिलायन्स सोडल्यार डीमार्ट आनी हेर सुपर मार्केट स्टोरां कडेन चर्चा जातली अशें सूत्रांनी सांगलें.
2023 वर्सा केंद्र सरकारान भारत आटा, भारत दाळ आनी भारत तांदूळ हीं उत्पादनां किरकोळ बाजारांत हाडलीं. गरिबी रेशे सकयल नाशिल्ल्यान जांकां प्रधानमंत्री गरीब कल्याण अन्न येवजणेचो फायदो मेळनाशिल्ल्या अशा लोकांक फावो त्या दरान अन्नधान्य दिवपा खातीर भारत ब्रँड सुरू केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
