भांगरभूंय | प्रतिनिधी
भारतान आशिया करंड क्रिकेट सर्तीच्या सुपर चारांतले मॅचींत येजमान श्रीलंका पंगडाक 41 धांवड्यांनी हारोवन फायनलींतली सुवात निश्चीत केली.
श्रीलंका पंगडाची फाटल्या 13 मॅची सावन चालू आशिल्ली जैताची धांव थांबली. हे हारीक लागून पाकिस्तानाची फायनलींत सुवात मेळोवपाची आस्त जिवी उरली. श्रीलंकेन ही मॅच जिखिल्ली जाल्यार पाकिस्तानाचें फायनलींत पावपाचें सपन भंगतलें आशिल्लें. श्रीलंका आनी पाकिस्तान ह्या पंगडां मदीं 14 तारखेक मॅच जातली. ती मॅच जिखून पाकिस्तान फायनलींत भारता आड खेळपाक शकता.
भारतान टॉस जिखून पयलीं बॅटींग करपाचो निर्णय घेतलो.पूण, श्रीलंकेच्या स्पिनरां मुखार भारताचो डाव 49.1 ओव्हरींनी फकत 213चेर सोंपलो. पूण, श्रीलंकेक ही मोख लेगीत हुपपात जमली ना. ताचो डाव 41.3 ओव्हरींनी 172चेर सोंपलो. भारता वतीन चायनामॅन कुलदीप यादवान सगल्यांत चड विकेटी घेतल्यो. ताणें 43 धांवड्यो दिवन सगल्यांत चड 4 विकेटी घेतल्यो.
भारत आपली फुडली मॅच बांगलादेशा आड 16 सप्टेंबराक खेळटलो.
दुनिथ वेलालगे (40-5) आनी चरिथ असलंका (18-4) हांणी कारकिर्दींतलें सर्वोत्कृश्ट प्रदर्शन करतना भारताचो डाव फकत 213चेर आडायलो.
एक दीस पयलीं ह्याच मैदानाचेर पाकिस्ताना आड खेळटना भारतान 2 विकेटी वगडावन 356 धांवड्यो केल्ल्यो. उपरांत पाकिस्तानाचो डाव सवाय भितर गुठलावन 228 धांवड्यांनी जैत जोडिल्लें. पूण, काल भारताचो डाव गडगडलो.
मुखेली रोहित शर्मान 48 बॉलांनी 53 धांवड्यांची खेळी केली. ताणें शुभमन गिला (13) वांगडा मेळून पयले विकेटी खातीर 80 धांवड्यांची भागिदारी केली. वेलालगेन आपले सुरवातीच्या तीन ओव्हरींनी गिल, विराट कोहली (3) आनी रोहित हाका बाद करून भारताक बॅकफुटाचेर धुकल्लो.
पाकिस्ताना आड नाबाद शेंकडो मारपी लोकेश राहुलान (39) आनी इशान किशनान (33) चवथे विकेटी खातीर 89 बॉलांनी 63 धांवड्यांची भागिदारी करून भारताक मॅचींत हाडपाचो यत्न केलो. पूण, वेलालगेन राहुलाक बाद करून ही जोडी फोडली. ते उपरांत असलंकान किशनाक तंबूत धाडलो आनी उपरांत सकयले सुवाते वयल्या बॅट्समनांक बाद केले. अक्षर पटेलान (26) मोहम्मद सिराजा (नाबाद 5) वांगडा मेळून निमाणे विकेटी खातीर 27 धांवड्यांची भागिदारी करून पंगडाक 213 मेरेन पावयलो.
मोखीचो फाटलाव करपी श्रीलंकेक जसप्रीत बुमरा आनी सिराज हांणी धपके दिले. पथुम निसंका (6), कुशल मॅण्डीस (15) आनी दिमुथ करुणारत्ने (2) हांकां पयल्या 10 ओव्हरींनी तंबूंत धाडले. चरिथ असलंका आनी सदीरा समरविक्रमा हांणी डाव सांबाळिल्लो. पूण, कुलदीपान सेगीत दोन ओव्हरींनी सदीरा (17) आनी असलंका (22) हांकां बाद केले.
रवींद्र जडेजान मुखेली दासून शनाकाक (9) बाद करून श्रीलंकेक व्हड धपको दिलो. श्रीलंकेचे स बॅट्समन 99 धांवड्यांचेर तंबूंत गेल्ले.
अशा वेळार धनंजया डिसिल्वा आनी दुनिथ वेल्लालागे हाणें सातवे विकेटी खातीर जबरदस्त भागिदारी केली. पांच विकेटी घेवपी वेल्लालागेचे जबरदस्त शॉर्ट पळोवन भारताच्या खेळगड्यांक अजाप जालें.
78 बॉलांनी 57 धांवड्यांची गरज आसतना पावस पडपाची लक्षणां दिसपाक लागली. ताका लागून वेल्लालागेन आक्रमक बॅटींग करपाक सुरवात केली. पूण, दुसरे वटेच्यान धनंजय 41 धांवड्यो करून बाद जालो. जडेजान 63 धांवड्यांची भागिदारी फोडली.
अखेरच्या 10 ओव्हरींनी श्रीलंकेक 44 धांवड्यांची गरज आशिल्ली. पूण, ताचे कडेन फकत तीन विकेटी बाकी आशिल्ल्यो. हार्दिक पांड्यान 41वे ओव्हरींत थीक्षणाक (2) बाद केलो. सुर्यकुमार यादवान मिड ऑनांत उत्कृश्ट कॅच धरली. फुडली जापसालदारकी कुलदीपान स्विकारली. ताणें रंजिथाक बोल्ड केलो. ते उपरांत पथिराणाक बोल्ड करून श्रीलंकेचो डाव 172चेर सोंपयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
