भांगरभूंय | प्रतिनिधी
भारतांत ऑक्टोबर-नोव्हेंबर ह्या कालावधीत 46 दीस संवसारीक वन डे क्रिकेट सर्तीच्यो 48 मॅची जातल्यो. आंतरराष्ट्रीय क्रिकेट समितीन काल संवसारीक सर्तीचें वेळापत्रक जाहीर केलें. उक्तावणाची मॅच 5 ऑक्टोबराक न्युझिलॅण्ड आनी इंग्लंड ह्या पंगडां मदीं जातली. ही मॅच अहमदाबादच्या नरेंद्र मोदी स्टेडियमाचेर जातली. ह्याच मैदानाचेर 19 नोव्हेंबराक फायनल जातली. सेमी फायनली मुंबय आनी कोलकाता ह्या शारांनी जातल्यो.
सर्तींतली सगल्यांत चर्चीत मॅच, म्हणल्यार भारत-पाकिस्तान मदली मॅच 15 ऑक्टोबराक नरेंद्र मोदी स्टेडियमाचेर जातली. पूण, भारत सर्तीक सुरवात ऑस्ट्रेलिये आडचे मॅची वरवीं करतलो. ही मॅच 8 ऑक्टोबराक चेन्नय जातली.
मजगतीं, सर्तींत 10 पंगड वांटो घेतले. येजमान भारत, पाकिस्तान, बांगलादेश, अफगाणिस्तान, न्युझिलॅण्ड, दक्षीण आफ्रिका, ऑस्ट्रेलिया आनी इंग्लंड ह्या पंगडांनी थेट पात्रताय मेळयल्या. जाल्यार दोन पंगड पात्रताय फेरये वरवीं सुवात निश्चीत करतले. ह्या दोन सुवातां खातीर आयर्लेण्ड, श्रीलंका, वॅस्ट इंडीज, नेपाळ, नॅदरलॅण्ड, ओमान, स्कॉटलॅण्ड, युएई, अमेरिका आनी झिम्बाब्वे ह्या पंगडां मदीं पात्रताय फेरयो चालू आसात.
मजगतीं, नॉकआवट मॅचीं खातीर राखीव दीस दवरला. म्हणल्यार दोनूय सेमी फायनली खातीर आनी फायनली खातीर राखीव दीस आसा.
10 शारांनी जातल्यो सर्तीच्यो मॅची
संवसारीक सर्तीच्यो मॅची भारतांतल्या 10 शारांनी जातल्यो. हातूंत अहमदाबाद (नरेंद्र मोदी स्टेडियम), बंगळुरू (एम चिन्नास्वामी स्टेडियम), चेन्नय (एमए चिदम्बरम स्टेडियम), दिल्ली (अरुण जेटली क्रिकेट स्टेडियम), धर्मशाला (हिमाचल प्रदेश क्रिकेट असोसिएशन स्टेडियम), हैदराबाद (राजीव गांधी आंतरराष्ट्रीय क्रिकेट स्टेडियम, उप्पल).
हाचे खेरीत कोलकाता (इडन गार्डन्स), लखनौ (अटल बिहारी वाजपय इकाना क्रिकेट स्टेडियम), मुंबय (वानखेडे स्टेडियम), पुणे (महाराष्ट्र क्रिकेट असोसिएशन स्टेडियम) हांचो आस्पाव आसा. हैदराबादा खेरीत गुवाहाटी आनी तिरुवनंतपुरम 29 सप्टेंबर ते 3 ऑक्टोबर मेरेन सरावाच्यो मॅची जातल्यो.
भारताच्यो मॅची
आड ऑस्ट्रेलिया, 8 ऑक्टोबर (चेन्नय)
आड अफगाणिस्तान, 11 ऑक्टोबर (दिल्ली)
आड पाकिस्तान, 15 ऑक्टोबर (अहमदाबाद)
आड बांगलादेश, 19 ऑक्टोबर (पुणे)
आड न्युझिलॅण्ड, 22 ऑक्टोबर, (धर्मशाला)
आड इंग्लंड, 29 ऑक्टोबर, (लखनौ)
आड क्वॉलिफायर-2, 2 नोव्हेंबर, (मुंबय)
आड दक्षीण आफ्रिका, 5 नोव्हेंबर (कोलकाता)
आड क्वॉलिफायर-1, 11 नोव्हेंबर (बंगळुरू)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
