भांगरभूंय | प्रतिनिधी
खबरां संस्था
नवी दिल्लीः भारतीय पंगड पाकिस्तानांत वचपा विशीं दुबाव आशिल्ल्यान भारत- पाकिस्तान हांच्यो मदल्यो चॅम्पियन सर्तींतल्यो मॅची यूएईतं जावपाचीी शक्यताय आसा. 2025 वर्सा चॅम्पियन्स करंड सर्त पाकिस्तानांत जातली. आयसीसीन आशिया कप सर्तीचे भारत- पाकिस्तान हांचे मदल्यो मॅची हाडब्रीड मॉडलेचार श्रीलंकेंत खेळयल्ल्यो. आयसीसीच्या कार्यकारमी मंडळाच्या सूत्रांनी दिल्ले म्हायती प्रमाण जर भारत सरकार आपल्या क्रिकेट पंगडाक पाकिस्तानात धाडपाक तयार ना जाल्यार आयसीसी बीसीसीआयचेर ते खातीर चेंपण घालपाक शकना. ते खातीर पर्याय सोदचो पडटलो . सध्या आयसीसी मडंळाची दुबयंत बसका चल्ल्या. चॅम्पियन सर्तीचो विषय बसकेंत ना तरीय मंडळ ताचेर चर्चा करपाक शकता.
पोरूं आशिया क्रिकेट सर्तीचे येजमानपद पाकिस्ताना कडेन आशिल्लें. मात भारतान थंय वचपाक न्हयकार दिल्ल्यान ही सर्त हायब्रीड मॉडेलाचेर जाल्ली. भारताच्यो मॅची श्रीलंकेंत जाल्ल्यो. कोलंबोत जाल्ले फायनलींत भारतान श्रीलंकेक 10 विकेटींनी हारोवन चॅम्पियनशीप जिखल्ली. चॅम्पियन क्रिकेट सर्ती खातीर भारतान पाकिस्ताना खेळपाक येवचें हें खातीर पाकिस्तान क्रिकेट मंडळाचो नवी अध्यक्ष मोहसीन नक्वी बीसीसीआयचो सचीव जय शहा आनी आयसीसीच्या वरिश्ठ अधिकाऱ्यां कडेन चर्चा करपाक शकता
चॅम्पियन क्रिकेट सर्तीची तारीख लागीं येतगीर बीसीसीआय आपलो निर्णय घेवपाक शकता अशें आयसीसीच्या एका वांगड्यान सांगलें. भारत- पाकिस्तान मॅची दुबयंत जावपाक शकतात अशें ताणे सांगलें.
आशिया कप सर्ती मजगतीं बीसीसीआयचो अध्यक्ष रॉजर बिन्नी आनी उपाध्यक्ष राजीव शुक्ला पाकिस्तानांत गेल्ले. ऑस्ट्रेलिाय, न्युझिलंड आनी इंग्लंडाचे तुळेंत भारतीय पंगडात पाकिस्तानांत चड धोको आसा हे गजाली कडेन आडनदर करपाक जायना. भारत आनी पाकिस्ताना मदले राजकी संबंद अजून बरे नात. पाकिस्तानांत आशिल्ले आतंकवादी भारतीय पंडाचेर हल्लो करपाक शकतात अशें तांणी सांगल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
