भांगरभूंय | प्रतिनिधी
वॉशिंग्टन, खबरां संस्थाः भारत आनी पाकिस्तान हांचे मदीं मे म्हयन्यांत जाल्ल्या संघर्शांत 5 झुजारी विमानां उडयिल्ल्याचो दावो अमेरिकी अध्यक्ष ट्रम्प डोनाल्ड हांणी केला. अणुशस्त्रां आशिल्ल्या दोनूय देशां मदलें झूज थांबोवपा खातीर आपूण मध्यस्थी केल्ली आनी तें करपा खातीर वेपारा संबंदीत दबावाचो उपेग केल्लो, अशेंय तांणी परतून सांगलें.
व्हायट हावसांत रिपब्लीकन खासदारां बरोबर जाल्ल्या डिनरा वेळार ट्रम्प उलयताले. मात खंयच्या देशाचीं, कसलीं विमानां उडयिलीं तें तांणी स्पश्ट करूंक ना. खरें म्हणल्यार विमानां हवेंतल्यान उडययिल्लीं. चार, पांच… म्हाका दिसता पांच विमानां उडयिल्लीं अशें ट्रम्प हांणी सांगलें.
10 मे दिसा भारत आनी पाकिस्तान हांचे मदीं झुज बंदी जाले उपरांत कांय दिसांनी एअर मार्शल ए. के. भारती हांणी भारतान पाकिस्तानाची कितलीशींच “हाय-टेक” झुजारी विमानां उडयल्यांत अशें म्हणिल्लें, पूण तांणीय अचूक आंकडो दिवंक नाशिल्लो.
मजगतीं, पाकिस्तानान आपलें फकत एअर फोर्साचे एकूच विमान किरकोळ लुकसाण करून उडयिल्ल्याचो दावो केल्लो. पाकिस्तानान राफेल सयत स भारतीय झुजारी विमानां उडयिल्ल्याचोय दावो केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
