भारत- पाकिस्तान शिमेर शस्त्रांची तस्करी

भांगरभूंय | प्रतिनिधी

अमृतसर, खबरां संस्था ः पंजाबांतल्या भारत- पाकिस्तान शिमेचेर शीम सुरक्षा दळाच्या कर्मचाऱ्यांनी आनी पंजाब पुलिसांनी केल्ल्या धा संयुक्त कारवायांनी शस्त्रां आनी हेरोयनाच्या खेपां सयत दोन तस्करांक अटक केल्या. जप्त केल्ली खेप आनी शस्त्रां पाकिस्तानी तस्करांनी ड्रोना वरवीं भारतांत धाडिल्लीं.
पयली कारवाय फाजिल्का जिल्ह्यांत जाली, थंय बीएसएफ पंगडान थळाव्या एसएसओसी फाजिल्काच्या सहकार्यान दुबावीत घराची तपासणी केली. ते वेळार दोन तस्करांक अटक केली. तस्करां कडल्यान दोन पिस्तूल, 23 ​​गुळयांनी भरिल्ले 9 मिमीचे काडतूस, दोन मॅगझीन आनी एक मोटारसायकल जप्त केल्या.
अबोहर जिल्ह्यांतल्या एका फार्महावसांतल्यान ही कारवाय केली. थंय तस्करांनी हे सामान लिपोवन दवरिल्ले. अटक केल्ल्या तस्करांक तांच्या नेटवर्काची वळख पटवपाक आनी चवकशी करपा खातीर थळाव्या पुलिसांच्या ताब्यांत दिला.
दुसरी कारवाय गुरदासपूर जिल्ह्यांतल्या गहलेरी गांवांत केली. थंय बीएसएफान पंजाब पुलिसांच्या सहकार्यान काळ्या पोतयेंतल्यान हेरोयनाचे दोन पॅकेट जप्त केल्यात. हेरोयनाचे वजन 1.07 किल आशिल्लें. हाचे भायर दोन .30 बोर पिस्तूल, .30 बोर काडतूसच्यो 46 गुळयो, 20 9 मिमी गुळयो आनी चार मॅगझीन पोतयेंत सांपडल्यात.
ही खेप पाकिस्तानी तस्करांनी ड्रोनां वरवीं सोडली. मजगतीं, एक बॅगूय मेळ्ळी, ताचेर आदले क्रिकेट खेळगडे शाहिद आफ्रीदीचो फोटो छापिल्लो आसलो.