भांगरभूंय | प्रतिनिधी
खबरां संस्था
अहमदाबादः शेनवारा अहमदाबादच्या नरेंद्र मोदी स्टेडियमाचेर जाल्ली वन-डे वर्ल्ड कप सर्तींतलो भारत आनी पाकिस्तान हांचे मदली मॅच डिजिटल प्लॅटफॉर्माचेर 3.5 कोटी लोकांनी डिज्नी हॉटस्टारार पळयली. इंडियन प्रीमियर लीगच्या (आयपीएल) 16व्या सिझनात चेन्नय सुपर किंग्ज आनी गुजरात टायटन हांचे मदली फायनल 3.2 लोकांनी लायव्ह स्ट्रिमिंगाचेर पळयली. मात व्हूयरशीप विशीं भारत- पाकिस्तान मॅचीन आतां नव्या विक्रमाची नोंद केल्या.
जेन्ना भारताची बॅटींग सुरू जाली तेन्ना डिज्नी प्लस हॉटस्टाराचेर तेन्नी ही मॅच पळोवपी पळयतल्यांचो आंकडो 3 कोटीच्या वयर गेलो. पाकिस्तानान 192 धांवड्यांचें लक्ष्य दिल्या उपरांत जायते भारतीय चाहते तांच्या पंगडाची बॅटींग पळोवपाक हाजीर आशिल्ल्याचें हाचे वयल्यान दिसून आयलें. पाकिस्तानाचो डाव सुरू आशिल्लो तेन्ना प्रेक्षकांचो आंकडो 2 कोटी आशिल्लो.
हालींच श्रीलंकेंत जाल्ल्या आशिया करंड क्रिकेट सर्तींत भारत आनी पाकिस्तान मॅच डिज्नी प्लस हॉटस्टार लायव्ह स्ट्रिमिंगाचेर 2.8 कोटी लोकांनी पळयल्ली. सध्या सुरू आशिल्ल्या आयसीसी वन-डे सर्तीचो डिज्नी प्लस अधिक्रत स्ट्रिमिंग भागिदार आसा. 2018 वर्सा जाल्ल्या वन-डे उपांत्ये फेरयेची मॅच 2.53 कोटी लोकांनी पळयल्ली. आयसीसी सर्तींतलो प्रेक्षकांचो व्हो आंकडो विक्रमी आशिल्लो. डिज्नी प्लस हॉटस्टार व्हो भारतांतलो स्टार स्पोर्ट्साचो डिजिटल स्ट्रिमींग भागिदार आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
