भारत-पाकिस्तान मदीं आयज ‘हाय व्हॉलटेज’ मॅच

भांगरभूंय | प्रतिनिधी

चॅम्पियन्स ट्रॉफीची ही आवृती भारत आनी पाकिस्तान ह्या पंगडां खातीर सामकी वेगळी थारल्या. पाकिस्तानाक पयले मॅचींत न्युझिलॅण्डा कडल्यान लजेक घालपी हार घेवची पडिल्ली, जाल्यार भारतान बांगलादेशाक हारोवन सर्तीची सुरवात केल्ली.

पाकिस्तानाची स्थिती बिकट आसा. सुमार तीन दसकां सावन जे आयसीसी सर्तीची येजमानकी करपाची वाट पळयतालो, तेच सर्तींतल्यान फकत चार दिसांनी भायर पडपाचें संकश्ट ताच्या मुखार उबें आसा. तशेंच ताचो फॉर्मांत आशिल्लो आक्रमक बॅट्समन फखर जमान दुखापतीक लागून सर्तींतल्यान भायर आसा.

रोहीत शर्माच्या फुडारपणा खाला खेळपी भारताचो पंगड आठ वर्सां पयलीं इंग्लंडांत जाल्ले चॅम्पियन्स ट्रॉफीचे फायनलींत पाकिस्ताना आड मेळिल्ले हारीचो बदलो घेवपाक इत्सूक आसतलो.

बांगलादेशा आडचे मॅचींत भारताचे बॅटींग आनी बॉलींग दोगांयचो कस लागलो.

एका वेळार अक्षर पटेल हॅट्रीक मेळोवपाच्या लागसार आशिल्लो, जाल्यार मोहम्मद शमीन पांच विकेटी घेवन आयसीसी सर्तींतलें आपलें बरें प्रदर्शन कायम दवरलें. विराट कोहली सवाय भितर बाद जावप भारताक मात्शें आडखळां आसतलें. पूण, शुभमन गीलाचें सातत्य आनी राहुल शर्माची आक्रमक बॅटींग पळोवन भारताचो आत्मविस्वास कायम आसतलो.

दुबयतली स्लो खेळपट्टी पाकिस्तानाची समस्या आनीक वाडोवपाक शकता. तांणी समस्या स्वताच तयार केल्या. कारण निवड समितीन फकत अबरार अहमद हाच्या रुपान एकूच तज्ञ स्पिनराची निवड केल्या. ताचे खेरीत सलमान आगा आनी खुशदील शाह हे पर्याय पंगडांत आसात. पूण, न्युझिलॅण्डा आडचे मॅचींत तांकां खाशेलो प्रभाव घालपाक जमूंक नाशिल्लो.

टॉस जिखपी पंगड पयलीं बॅटींग करपाचो निर्णय घेवपाक शकता. हाचे फाटलें मुखेल कारण म्हणल्यार खेळ जसजसो मुखार वता तसतशी खेळपट्टी स्लो जायत वतली. तशेंच दुबय मॅची बेगीन सुरू जातात ताका लागून दंवाचो प्रभाव लेगीत उणो जाता.

भारताच्या इकरा वांगड्यांच्या पंगडांत कसलोच बदल जातलो अशें दिसना. अर्शदीप सिंगाचे सुवातेर हर्षित राणाक खेळपाची संद मेळ्ळी आनी ताणें संदीचें भांगर केलें. कुलदीप यादवाक फाटले मॅचींत एकूय विकेट मेळूंक नासली तरी ताचे सुवातेर वरुण चक्रवर्तीक खेळोवपाची संद उणीच दिसता.

पाकिस्तानान जखमी जमानाचे सुवातेर ओपनर इमाम उल हकाची निवड केल्या. तांचे कडेन उस्मान ख्वाजाच्या रुपान पर्याय आसा. पूण, ताका व्हड सर्तींत खेळपाचो अणभव ना. ताका लागून इमाम उल हकाचें पुनरामन जातलें अशी आस्त आसा. इमाम उल हक पाकिस्ताना वतीन निमाणे खेपे 2023चे संवसारीक वन डे क्रिकेटींत खेळिल्लो.