भांगरभूंय | प्रतिनिधी
नवी दिल्ली, खबरां संस्था ः बीसीसीआयन सध्या खातीर आयपीएल सर्त स्थगीत केल्या. सध्या भारत पाकिस्ताना मदीं विमान, ड्रोन हल्ले चालू आसात. ते चालूच उरले जाल्यार क्रिकेट खेळप शक्य ना. भारत – पाकिस्तान मदीं वाडत आशिल्ल्या तणावाच्या फाटभुंयेर बीसीसीआयन हो निर्णय घेतला. खेळगड्यांची सुरक्षे खातीर हो निर्णय घेतलां अशें बीसीसीआयन सांगलां. ह्या निर्णया उपरांत आतां विदेशी खेळगड्यांक परतून धाडटले.
आयपीएल सर्तीतले वट्ट 16 मॅची उरल्यात. आतां ह्यो 16 मॅची मागीर जातल्यो. पूण त्यो मॅची नेमक्यो केन्ना जातल्यो हाची म्हायती बीसीसीआयन दिवंक ना.
भारत आनी पाकिस्तान हांचे मदीं झूज आनीक वाडपाची शक्यताय आसा. हे फाटभुंयेर आतां बीसीसीआयन आयपीएल सर्त स्थगीत करपाचो निर्णय घेतला. आयपीएलांतल्या सगळ्या पंगडांनी जायते विदेशी खेळगडे खेळटात. भारत आनी पाकिस्तान हांचे मदीं वाडत आशिल्ल्या वादाक लागून ह्या परदेशी खेळगड्यांचे सुरक्षे विशीं हुस्को निर्माण जाला.
काल हिमाचल प्रदेशांतल्या धर्मशाळां आशिल्लो पंजाब आनी दिल्ली मॅच पाकिस्तानी ड्रोन हल्ल्या उपरांत थांबयली. फुडाराकय अशीच समस्या निर्माण जावंक शकता. ते खातीर बीसीसीआयन आयपीएल सर्त सध्या थांबवपाचो आनी उरिल्ली आयपीएल सर्त अनिश्चित काळा खातीर फुडें धुकलपाचो निर्णय घेतला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
