भांगरभूंय | प्रतिनिधी
नवी दिल्ली, खबरां संस्था: भारत आनी पाकिस्तानान अणुकेंद्रीय सुविधांची वळेरी परस्परांक दिल्या अशी म्हायती परराष्ट्र मंत्रालयान दिली. अणुकेंद्राचेर हल्ले करचे न्हय, हाचे खातीर दोनूय देश फाटल्या तीन दसकां पसून ही वळेरी दितात. तसो करार दोनूय देशांत जाला.
परराष्ट्र मंत्रालयान दिल्ले म्हायतींत म्हणलां, राजनैतीक माध्यमा वरवीं भारत आनी पाकिस्तानान बुधवारा अणुकेंद्रीय सुविधांची वळेरी संबंदीतांक दिली. ह्या आस्थापनांचेर आनी अणुकेंद्रांचेर करारा प्रमाण हल्लो करपाक प्रतिबंध आसा. हो करार ३१ डिसेंबर १९८८ दिसा जालो. २७ जानेवारी १९९१ सावन कराराची अंमलबजावणी जाता.
भारतीय नुस्तेंमार्यांची सुटका करची
पाकिस्तानांत बंदखणीचे ख्यास्तीचो काळ पुराय जाल्ल्या १८३ भारतीय नुस्तेंमार आनी सामान्य नागरिकांची सुटका करची, अशी मागणी भारतान बुधवारी केली. तशेंच, १८ नागरीक आनी नुस्तेंमार्यांक मेळपा खातीर भारताचे वकिलातीक परवानगी दिवची, अशीय मागणी भारतान केल्या. परराष्ट्र मंत्रालयान ही म्हायती दिली. दर वर्सा १ जानेवारी आनी १ जुलयाक दोनूय देशांत बंदखणींत आशिल्ल्या नागरिकांची वळेरी दितात. २००८ त हो करार जालो. भारतान ३८१ नागरिकांची आनी ८१ नुस्तेंमार्यांची वळेरी पाकिस्तानाकडेन दिली, जाल्यार पाकिस्तानान ४९ नागरीक आनी २१७ नुस्तेंमार्यांची वळेरी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
