भांगरभूंय | प्रतिनिधी
हरमनप्रीत सिंगाच्या फुडारपणाखाला खेळपी भारताच्या दादल्यांच्या हॉकी पंगडान काल जाल्ले उमळशीक वाडोवपी फायनलींत येजमान चीन पंगडाक 1-0 हारोवन आशियायी हॉकी चॅम्पियन्स सर्त पांचवे खेपे जिखली.
मॅचींतलो एकोडो आनी म्हत्वाचो गोल चवथ्या क्वॉर्टरांत जुगराज सिंगान (51वें मिनट) केलो. मुखेली हरमनप्रीत सिंगान जुगराजाक पास दिलो. जुगराज चीन पंगडाच्या गोलपोस्टाक सामको लागीं आशिल्लो. ताणें कसलीच चूक करिनासतना बॉल गोलपोस्टांत घालो. होच गोल भारताक वस्ताद करपाक निर्णायक थारलो. ह्या जैता सयत भारतान एकूय मॅच हारिनासतना वस्तादपण जोडलें.
भारताक मॅचीच्या 10व्या मिनटाक एका फाटल्यान एक अशे दोन पॅनल्टी कॉर्नर मेळ्ळे. पूण, भारताक तांचो फायदो घेवपाक जमलो ना. पयल्या क्वॉर्टरांत दोनूय पंगडांनी उमळशीक वाडोवपी खेळ केलो. पयल्या क्वॉर्टराचे अखेरच्या मिनटाक चीन पंगडाक एक पॅनल्टी कॉर्नर मेळिल्लो. पूण, ताका गोल करपाक अपेस आयलें.
दुसऱ्या क्वॉर्टरांत चीन पंगडान भारताक जबरदस्त आव्हान दिलें. ह्या क्वॉर्टरांत भारताक गोल करपाच्यो कांय संदी मेळ्ळ्यो. पूण, चीनाच्या डिफॅण्डरांनी भारताचे हल्ले येसस्वी रितीन परतावन लायले. ते उपरांत तिसऱ्या क्वॉर्टरांत लेगीत एकूय गोल जालो ना. तिसऱ्या क्वॉर्टरांत चीन पंगडान आक्रमक खेळ केलो. ताणें गोल करपाच्यो कांय संदी लेगीत तयार केल्यो. पूण, तांकां भारताचो डिफॅन्स भेदपाक जमलो ना.
चवथ्या क्वॉर्टरांत भारतान गोलाची कोंयडी फोडली. 51व्या मिनटाक जुगराजान मैदानी गोल करून भारताक आघाडी मेळोवन दिली. लीग पांवड्यार लेगीत भारतान चीन पंगडाक 3-0 असो हारयिल्लो.
मजगतीं, दक्षीण कोरियाक 5-2 अशा गोल फरकांनी हारोवन पाकिस्तानान कांश्या पदक जिखलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
