भांगरभूंय | प्रतिनिधी
पयल्या दिसाचो खेळ सोंपपाक फकत दोन ओव्हरी बाकी आशिल्ल्यो त्या वेळार विराट कोहली, यशस्वी जयस्वाल आनी मोहम्मद सिराज बाद जाल्ल्यान मुंबय टॅस्टींत लेगीत भारत पुर्णपणान बॅकफुटाचेर गेलो.
भारत आनी न्युझिलॅण्ड ह्या पंगडां मदीं काल सावन सुरू जाल्ले तिसरे टॅस्टीच्या पयल्या दिसा वट्ट 14 विकेटी पडल्यो. ह्या आंकड्या वयल्यान वानखेडे मैदानाची खेळपट्टी कशी आसा हें स्पस्टपणान दिसून येता. अशे तरेचे खेळपट्टीचेर रोहीत शर्मा परतून एकदा टॉस हारलो. हातूंतल्यान एक गजाल सुनिश्चीत जाली ती म्हणल्यार बॅट्समनां खातीर खेळपट्टी कठीण जातली त्या वेळार भारताची बॅटींग येतली.
खेळपट्टीचें स्वरूप मतींत घेवन न्युझिलॅण्डाचो मुखेली टॉम लॅथमान टॉस जिखून पयलीं बॅटींग करपाचो निर्णय घेतलो. पूण, रवींद्र जडेजा (5-65) आनी वॉशिंग्टन सुंदर (4-81) हांच्या यत्नांक लागून न्युझिलॅण्डाचो डाव 235 धांवड्यांचेर आडावपाक भारताक शक्य जालें. जडेजान टॅस्टींत 14वे खेपे एका डावांत पांच विकेटी घेतल्यो. न्युझिलॅण्डा वतीन विल यंग आनी डॅरील मिचेल हांणी अर्द शेंकड्यांची खेळी केली. धांवड्यांचो फाटलाव करपी भारतान फकत 86 धांवड्यांचेर 4 विकेटी व्हगडायल्यो.
मुखेली रोहीत शर्माचो बाबत फॉर्म चालूच आसा. तो फकत 18 धांवड्यो करून बाद जालो. मॅट हॅन्रीचे बॉलिंगेचेर स्लिपांत कॅच बाद जालो. यशस्वी जयस्वाल स्विप करपाच्या यत्नांत बोल्ड जालो. तो बाद जालो त्या वेळार फकत दोन-तीन ओव्हरीच बाकी आशिल्ल्यो. ते उपरांत पंगड वेवस्थापनान मोहम्मद सिराजाक नायट वॉचमॅन म्हणून धाडलो. पूण, तो पयल्याच बॉलाचेर एलबीडब्ल्यू बाद जालो. सिराज बाद जालो त्या वेळार लेगीत भारताक हुस्को करपाची गरज नाशिल्ली. पूण, ते उपरांत फुडलेच ओव्हरींत कोहली धांवबाद जालो. ते उपरांत भारत पुर्णपणान संकश्टांत आसा.
न्युझिलॅण्डाच्या डावा विशीं सांगचें जाल्यार तांची लेगीत सुरवात खाशेली थारूंक ना. फकत 15 धांवड्यांचेर ताणें डॅव्होन कॉन्वेची विकेट व्हगडायिल्ली. ताका आकाशदीपान बाद केलो. ते उपरांत लॅथमाक लेगीत तंबूंत परतून वचपाक चड वगत लागूंक ना. तो वॉशिंग्टन सुंदराच्या बॉलाचेर बोल्ड जालो.
न्युझिलॅण्डा वतीन सगल्यांत व्हड भागिदारी यंग आनी मिचेल हांचे मदीं जाली. दोगांयनी 87 धांवड्यांची भागिदारी केली. फाटल्या कांय मॅची सावन मिचेल फॉर्मांत नाशिल्लो. पूण, वानखेडेचे कठीण खेळपट्टीचेर ताणें 81 धांवड्यांची म्हत्वाची खेळी केली. ताचे खेरीत सकयल्या कांय बॅट्समनांनी ल्हान-ल्हान भागिदाऱ्यो केल्यो. ताका लागून न्युझिलॅण्डाक सन्मानजनक धांवसंख्या उबारपाक शक्य जालें. भारताक जैत जोडपाक खूब बरी बॅटींग करची पडटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
