भांगरभूंय | प्रतिनिधी
भारत आनी ऑस्ट्रेलिया ह्या पंगडां मदीं 19 वर्सां पिराये सकयली दुसरी टॅस्ट मॅच सुरू जाली. काल पयल्या दिसा भारतान 5 विकेटी व्हगडावन 316 धांवड्यो केल्यात. चार बॅट्समनांनी अर्द शेंकड्याची खेळी केली. नित्य पंड्याक फकत स धांवड्यांनी शेंकडो चुकलो. तो 94 धांवड्यांचेर बाद जालो.
ऑस्ट्रेलिये वतीन हॅरी होक्स्ट्रान दोन विकेटी घेतल्यो.
पयले मॅचींत शेंकडो मारपी वैभव सूर्यवंशी काल फकत 3 धांवड्यो करून बाद जालो. पयली मॅच भारतान 2 विकेटींनी जिखिल्ली.
टॉस जिखून पयलीं बॅटींग करपाचो निर्णय घेवपी भारताची सुरवात बरी जाली ना. वैभव सूर्यवंशी चार बॉलांनी फकत तीन धांवड्यो करून बाद जालो. दुसरो ओपनर विहान मल्होत्रान नित्या वांगडा मेळून अर्द शेंकड्याची भागिदारी केली. पूण विहान वैयक्तीक 10 धांवड्यांचेर बाद जालो.
60 धांवड्यांचेर 2 विकेटी व्हगडायल्या उपरांत नित्य पंड्या आनी केपी कार्तिकेय हांणी डाव सांबाळ्ळो. दोगांयनी पंगडाची धांवसंख्या 100 वयर पावयली. हे मजगतीं, दोगांयनी आपले अर्द शेंकडे पुर्ण केले. नित्य 94चेर बाद जालो. बाद जावचे पयलीं ताणें कार्तिकेयना वांगडा मेळून 112 धांवड्यांची भागिदारी केल्ली. ते उपरांत कार्तिकेय लेगीत 71 धांवड्यो करून बाद जालो. 185चेर भारतान आपली 4थी विकेट व्हगडायली.
200 भितर 4 विकेट पडल्या उपरांत मुखेली सोहम पटवर्धन आनी निखील कुमार हांणी डाव सांबाळ्ळो. दोगांयनी शेंकड्याची भागिदारी केली आनी पंगडाचो स्कोर स्कोर 300च्या लागसार पावयलो. पयल्या दिसाचो खेळ सोंपपाक कांय मिनटां बाकी आसतना निखील 61 धांवड्यो करून बाद जालो.
पयल्या दिसाचो खेळ सोंपलो त्या वेळार सोहम 61 आनी विकेटकीपर बॅट्समन हरवंश पंगालिया 7 धांवड्यो करून खेळपट्टीचेर आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
