भांगरभूंय | प्रतिनिधी
नवी दिल्ली, खबरां संस्था ः तैवान ते लडाख मेरेन चालू आशिल्ल्या तणावाच्या काळांत आशियांतल्या बळिश्ट देशांची वळेरी आयल्या. रशिया आनी जपानाक फाटीं घालून भारत आशियांतलो तिसरो बळिश्ट देश थारलो. हे वळेरेंत चीन भारता परस फुडें आसा आनी अमेरिका पयल्या सुवातेर आसा. ऑस्ट्रेलियेच्या लोवी इन्स्टिट्यूट थिंक टँकान जाहीर केल्ल्या आशिया पॉवर इंडेक्सांत भारतान बरी कामगिरी केल्या. जपानाची अर्थीक शक्त उणी जाल्ल्यान तो सकयल देंवलो. आतां जपान हो आशियांतलो चवथो बळिश्ट आनी प्रभावी देश जाला. ह्या देशांच्या साधनसंपत्ती आनी प्रभावाचो विचार करून दर वर्सा ही वळेरी जाहीर करतात. हे वळेरेंत ऑस्ट्रेलिया पांचवो आसा आनी युक्रेन झुजांत अडकिल्ल्या रशियेक सवो क्रमांक मेळ्ळा.
अमेरिका 81.7 गूण, चीन 72.7 आनी जपानाक 38.9 गूण मेळ्ळे. जाल्यार पाकिस्तानाक फकत 14.6 गूण मेळ्ळे आनी तो सोळाव्या क्रमांकाचेर आसा. आशिया पॉवर इंडेक्सांत वट्ट 27 देशांचें आनी प्रदेशांचें मुल्यांकन केलें. ह्या देशां कडेन कितें आसा आनी ताचे बरोबर ते कितें करतात तें हांतूत पळयलें. तातूंत पाकिस्तान सयत रशिया, ऑस्ट्रेलिया, न्यूझीलंड आनी पॅसिफीक वाठारांतले अमेरिकेचोय आस्पाव केलो. हातूंत 6 वर्सांचो डेटा वापरलो.
भारताक पयलेच खेपे तिसरो क्रमांक…
आशिया खंडात भारताची ताकद वाडत आसा अशें अहवालांत म्हणलां. शक्तीच्या नदरेन भारताक पयलेच खेपे तिसरो क्रमांक मेळ्ळा. पूण भारतांत व्हड संसाधने आनी व्हड शक्त जावपाची अफाट तांक आसा. भारतान लश्करी सत्तेंत चवथो, सांस्कृतीक प्रभावांत चवथो, अर्थीक क्षमतेंतूय चवथो, फुडाराच्या साधनसंपत्तींत तिसरो आनी राजनैतिक प्रभावांत चवथो क्रमांक मेळयलो. भारताची एकंदरीत क्रमवारी आतां आशियांत तिसऱ्या क्रमांकाचेर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
