भांगरभूंय | प्रतिनिधी
फायनलींत सुवात निश्चीत करपी भारताचो पंगड आयज आशिया करंड क्रिकेट सर्तीच्या सुपर चारांतले आपले निमाणे मॅचींत आदींच आव्हान सोंपिल्ल्या बांगलादेशा आड खेळटलो. हे मॅची वरवीं भारत संभाव्य खेळगड्यांक खेळोवपाची शक्यताय आसा.
संवसारीक वन डे क्रिकेट सर्ती खातीर वेंचिल्ल्या खेळगड्यांक चडांतचड खेळोवपाची संद दिवची काय फुडल्या म्हयन्यांत जावपी संवसारीक सर्ती पयलीं कांय संभाव्य खेळगड्यांक संद दिवची हाचेर पंगड वेवस्थापनाक खर विचार करचो पडटलो. हो प्रस्न बॉलरां खातीर चड म्हत्वाचो आसा. फास्ट बॉलर जसप्रीत बुमरान आशिया करंड सर्तींत अजून मेरेन फकत 12 ओव्हरी घाल्या. पाकिस्ताना आड पांच आनी श्रीलंके आड सात ओव्हरी केल्यात. नेपाळा आड तो खेळूंक नाशिल्लो. ताका लागून बुमराक आयचे मॅचीत खेळोवचो काय हे मॅची खातीर विसव दिवन थेट फायनलींत खेळोवचो हो प्रस्न पंगड वेवस्थापनाक पडला आसतलो.
मोहम्मद सिराजान 19.2 ओव्हरी आनी हार्दिक पांड्यान 18 ओव्हरी केल्या. ह्यो ओव्हरी उण्यो दिसता आसल्यो तरी कोलंबोंत खूब गर्मी आसात. हे गर्मींत खेळगड्यांची उर्जा उणी जाता. ताका लागून हातूंतल्या एकल्याक विसव दिवपा विशीं पंगड वेवस्थापन विचार करपाक शकता. आयचे मॅची खातीर सिराजाचे सुवातेर मोहम्मद शमीक खेळयलो जाल्यार अजाप जावपाची गरज ना.
सध्या शमीचो बुमरा, सिराज आनी पांड्या हांचो बॅकअप फास्ट बॉलराच्या रुपान पंगड उपेग करता. पूण, पंगडा खातीर अक्षर पटेलाचे बॉलिंगेचो ग्राफ देंवपाक लागला हो पंगडा खातीर हुस्क्याचो विशय आसा. कारण ताचो रवींद्र जडेजाचो कव्हराच्या रुपान वापर जाता. अक्षर पटेलाक विकेटी मेळूंक ना आनी धांवड्यांचेरूय अंकुश दवरप शक्य जावंक ना. अक्षर अंदूं सात वन डे मॅचींनी खेळ्ळा आनी स इकोनोमी रेटीन फकत तीन विकेटी घेतल्यात. ताका आपल्या खेळांत सुदारणां करपाची गरज आसा.
लोकेश राहुल फॉर्मांत येवप पंगड वेवस्थापना खातीर थाकाय दिवपी गजाल थारल्या. ताणें खेळपट्टीचेर तग धरून बॅटींग केल्या. ताका आनीक सराव मेळचो म्हणून पंगड वेवस्थापन आयचे मॅचींत लेगीत खेळोवपाक शकता. श्रेयस अय्यराचे तंदुरुस्तीचेर पंगडाची नदर आसतली. फाटीचे दुखापतीक लागून ताका पाकिस्तान आनी श्रीलंके आडची मॅच चुकिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
