भांगरभूंय | प्रतिनिधी
खबरां संस्था
ओल्ड एडवर्डियन्सः भारत, दक्षीण आफ्रिका आनी अफगाणिस्तान हाचे मदले अंडर-19 ट्राय माळेंतली भारत आनी द. आफ्रिके मदली फायनल पावसाक लागून रद्द करची पडली. टॉस लेगीत जावपाक शकलो ना. ताका लागून दोनूय पंगडांनी करंड शॅर केलो. ओल्ड एडवर्डियन्स क्रिकेट मैदानार दीसभर पावस पडलो.
मॅच रेफ्रीन मॅच सुरू करपा खातीर कट ऑफ वेळ मेरेन वाट पळयली. मात पावस थांबलो ना आनी फायनल रद्द करपाचो निर्णय घेवचो पडलो. भारताच्या अंडर-19 पंगडान लीग फेरयेंत एक लेगीत मॅच वोगडायली ना. आपल्यो सगल्यो मॅची तांणी एकतर्फी जिखल्यो. भारतान पयले मॅचींत अफगाणिस्तानाक 6 विकेटींनी हारयल्लें. दुसरे मॅचींत दक्षीण आफ्रिकेक लेगीत 6 विकेटींनी हारयलें. तिसरे मॅचींत अफगाणिस्तानाक 9 विकेटींनी आनी चवथे मॅचींत द. आफ्रिकेक 6 विकेटींनी हारोवन 8 गुणांनी ग्रुपांत पयली सुवात मेळयल्ली.
सर्तीचो वस्ताद जावपाची भारतीय पंगडाक सामकी संद आशिल्ली पूण पावसाक लागून तें जावपाक शकलें ना आनी दक्षीण आफ्रिके वांगडा तांका करंड शॅर करचो पडलो. भारतीय पंगडाची नदर आतां अंडर -19 वर्ल्ड कपाचेर आसा. भारतान आतां मेरेन पांच फावट अंडर-19 वर्ल्ड कप किताब आपल्या नांवार केला. शेनवाराक प्रिटोरियांत अंडर -19 वर्ल्ड कप लीग फेरयेंत भारताची ऑस्ट्रेलिये आड सराव मॅच जातली. 17 जानेवारीक श्रीलंके आड दुसरी सराव मॅच जातली. अंडर-19 वर्ल्ड कपाच्यो लीग मॅची 19 जानेवारीच्यान सुरू जातल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
