भांगरभूंय | प्रतिनिधी
बंगळुरूः भारतान दक्षीण आशियायी फुटबॉल फॅडरेशन चॅम्पियनशीप (सॅफ) जिखली. फायनलींत ताणें कुवेत पंगडाक शुटआवटांत 5-4 अशा गोल फरकांनी हारोवन वस्तादपण जोडलें. भारताचो हो णववो किताब थारलो.
निर्धारीत वेळां मेरेन दोनूय पंगड 1-1 अशे बरोबरींत आशिल्ले. ते उपरांत अतिरिक्त वेळांत गोल जावंक नाशिल्ल्यान निकाल लावपाक पॅनल्टी शुटआवटाचो आदार घेवचो पडलो. पॅनल्टी शुटआवटांत भारतान पांच जाल्यार कुवेत पंगडान चार गोल केले.
भारतान सेमी फायनलींत लेबनान पंगडाक शुटआवटांत 4-2 अशा गोल फरकांनी जाल्यार कुवेत पंगडान बांगलादेशाक 1-0 अशा गोल फरकान हारोवन फायनींतली सुवात निश्चीत केल्ली. भारत सर्तींत दुसरे खेपे कुवेत पंगडा आड खेळ्ळो. हाचे पयलीं अ गटांतले मॅचींत भारताक निमाण्या खिणाक कुवेता आड बरोबरींत समाधान मानचें पडिल्लें.
हांगाच्या श्रीकांतिरवा स्टेडियमाचेर जाल्ले मॅचीच्या पयल्या अर्दांत दोनूय पंगड 1-1 अशे बरोबरींत आशिल्ले. मॅच सुरू जाल्या उपरांत कांय वेळा उपरांत कुवेत पंगडान भारताची बचावफळी भेदून आपलें खातें उगडलें. मिडफिल्डर शाबीब अलखाल्डीन 14व्या मिनटाक हो गोल केलो.
एका गोलान फाटीं पडिल्ल्या भारतान ते उपरांत आक्रमक आनी जलद खेळ करपाचो यत्न केलो. आक्रमक खेळ करपाच्या नादांत भारताच्या संदेश झिंगनाक यॅर्लो कार्ड मेळ्ळें. ते उपरांत भारतान अन्वर अलीक भायर आपोवन ताचे सुवातेर मेहताब सिंगाक मैदानांत धाडलो.
अखेरेक छांगटेन 38व्या मिनटाक समादचे मजतीन भारताक बरोबरीचो गोल करून दिलो.
पॅनल्टी शुटआवटांत भारता वतीन महेश सिंग, सुभाषीष बोस, लल्लियांझुआला चांगटे, संदेश झिंगन आनी सुनील छेत्री हांणी गोल केले.
भारतान हाचे पयलीं 1993, 1997, 1999, 2005, 2009, 2011, 2015 आनी 2021त ही सर्त जिखल्या, जाल्यार चार खेपे उपवस्ताद थारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
