भांगरभूंय | प्रतिनिधी
नवी दिल्ली : देशांतली पयली सहकारी टॅक्सी सेवा ‘भारत टॅक्सी’चें उक्तावण दबाज्यान जालें. केंद्रीय गृह आनी सहकार मंत्री अमीत शाह हांणी बिरेस्तारा ह्या सेवेचें उक्तावण केलें. भारत टॅक्सी ड्रायव्हरांक मालकी हक्क दितली आनी तांची अर्थीक आनी समाजीक सुरक्षा निश्चीत करतली. हे येवजणेंतल्यान वाहन चालकांक पेन्शन आनी विमो मेळटलो, अशें शाह हांणी सांगलें.
केंद्र सरकारा कडल्यान ‘भारत टॅक्सी’ ही भारतांतली ॲप-आधारीत वाहन सेवा सुरू जाल्या. दोन वर्सांत सगल्या राज्यांत ह्या सेवेचो विस्तार जातलो. गोंयांतूय ही सेवा मेळटली.
मजगतीं, गुगल सर्च केल्यार भारत टॅक्सी सेवा गोंयांतूय आसा म्हूण पुश्टी जातां. गुगलाचेर सर्व्हीस प्रोव्हायडराचे नंबरूय आसात.
सहकारी संस्थां वरवीं ल्हान भांडवल एकठांय केल्यार व्हड व्हड गजाली कशीं साध्य करूं येतात हाची एक देख भारत टॅक्सी आसा, अशें अमीत शाह हांणी सांगलें. टॅक्सी चालकां खातीर, आपल्या भाव-भयणीं खातीर हो दीस म्हत्वाचो अशें तांणी सांगलें. भारत टॅक्सी कडेन संबंदीत ड्रायव्हरांक फकत चड फायदो मेळचो ना पूण ते स्वाभिमानान मालकीदार आसतले.
फुडल्या तीन वर्सांत काश्मीरा सावन कन्याकुमारी मेरेन आनी द्वारका सावन कामाख्या मेरेन भारत टॅक्सीचो विस्तार देशभर करतले अशें गृह मंत्र्यान सांगलें. ही येवजण टॅक्सी चालकांच्या कल्याणाचें मुखेल साधन थारतली. सरकार न्हय जाल्यार सहकारी संस्था टॅक्सी क्षेत्रांत प्रवेश करतात अशें तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
