भांगरभूंय | प्रतिनिधी
येजमान बांगलादेशा आड चालू आशिल्ली पयली टॅस्ट जिखपाक भारताक फक्त चार विकेटींची गरज आसा. मॅचीच्या चवथ्या दिसा बांगलादेशान आपल्या दुसऱ्या डावांत 6 विकेटी वगडावन 272 धांवड्यो केल्यात. शाकिब अल हसन 40 आनी हसन मिराज 9 धांवड्यांचेर खेळटा.
भारता वतीन अक्षर पटेलान सगल्यांत चड 3 विकेटी घेतल्यो. उमेश यादव, आर आश्विन आनी कुलदीप यादव हांणी दरेकी एक विकेट मेळयली.
आयच मॅचीच्या निमाण्या दिसा बांगलादेशाक जैता खातीर आनीक 241 धांवड्यांची गरज आसा.
चवथ्या दिसा बांगलादेशा वतीन जाकीर हसनान (100) पदार्पणाचे मॅचींत शेंकडो नोंदयलो. पदार्पणाचे मॅचींत शेंकडो मारपी तो बांगलादेशाचो चवथो बॅट्समन थारलो.
नजमूल हसन शान्तोन 67 धांवड्यांची खेळी केली. हसन आनी शान्तो हांणी पयले विकेटी खातीर 124 धांवड्यांची भागिदारी केली. दोगांयनी भारताक पयले विकेटी खातीर 46 ओव्हरी मेरेन वाट पळोवपाक लायली.
भारतान पयल्या डावांत 404 धांवड्यो केल्ल्यो. ताका जाप दितना बांगलादेशाक फक्त 150 धांवड्यां मेरेन मजल मारप शक्य जाल्लें. ते उपरांत भारतान आपलो दुसरो डाव 2 बाद 258चेर घोशीत करून प्रतिस्पर्धी पंगडाक 513 धांवड्यांची मोख दिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
