भांगरभूंय | प्रतिनिधी
2023 वर्सा गिरेस्तांचो आंकडो 6 टक्क्यांनी वाडलो
नवी दिल्ली, खबरां संस्था ः हालींच्या काळांत देशांत गिरेस्त लोकांचो आंकडो वाडत आसा. भारत आतां गिरेस्त लोकांचो देश जावपाक लागला. दर वर्सा देशांतल्या गिरेस्त लोकांचो आंकडो वाडत आसा. 2023 वर्सा गिरेस्त लोकांचो आंकडो 6 टक्क्यांनी वाडलो. म्हणल्यार ह्या एकाच वर्सात भारतांत 13,263 नागरिक गिरेस्त जाल्यात. नाईट फ्रँक इंडियाने हो अहवाल जारी केला.
अहवाला प्रमाण, देशांतल्या गिरेस्त लोकांचो आंकडो व्हड प्रमाणांत वाडलो. भारताची अर्थवेवस्था नेटान मुखार वचत आसा, ताका लागून वर्सान वर्स गिरेस्त लोकांचो आंकडोय वाडत आसा अशी म्हायती मुखार आयलां. अहवालांतल्या आंकड्यां प्रमाण भारतांतल्या गिरेस्त लोकांचो आंकडो वर्सुकी 6 टक्क्यांनी वाडून 2023 वर्सा 13,263 जालो. देशांतल्या वाडट्या समृध्दीक लागून 2028 मेरेन अल्ट्रा-हाय नेट वर्थ (UHNI) व्यक्तींचो आंकडो सुमार 20 हजार मेरेन वाडपाचो अदमास आसा. UHNI म्हळ्यार अशीं व्यक्ती, जांची निव्वळ संपत्ती 30 दशलक्ष डॉलर वा ताचे परस चड आसा.
‘द वेल्थ रिपोर्ट-2024’ जाहीर
द वेल्थ रिपोर्ट 2024 जाहीर केला. अहवाला प्रमाण भारतांतल्या UHNI चो आंकडो 6.1 टक्क्यांनी वाडून 2024 वर्सा 13,263 जातलो. फाटल्या वर्सा हो आंकडो 12,495 आशिल्लो. भारतांतल्या UHNI चो आंकडो 2028 मेरेन वाडून 19,908 मेरेन वाडपाची शक्यताय आसा. देशांत संपत्ती निर्माण करपाच्या मळार बदलाचो युग चालू आसा. देशांतल्या अति गिरेस्त लोकांचो आंकडो बरोच वाडला. फुडल्या पांच वर्सांत तातूंत 50.1 टक्क्यांनी वाड जावपाची शक्यताय आसा.
2024 वर्साय व्हड वाड जावपाची शक्यताय
नाइट फ्रँकाच्या अहवाला प्रमाण 2024 वर्साय सुमार 90 टक्के भारतीय UHNI च्या संपत्तींत वाड जावपाची शक्यताय आसा. त्याच वेळार 63 टक्के मालमत्तेचें मोल 10 टक्क्यां परस चड वाडपाची अपेक्षा आसा. फुडल्या पांच वर्सांत संवसारीक पांवड्यार गिरेस्त लोकांचो आंकडो 28.1 टक्क्यांनी वाडून 8,02,891 जावपाची शक्यताय आसा. संवसारीक पांवड्यार UHNI चो आंकडो 2024 वर्सा 4.2 टक्क्यांनी वाडून 6,26,619 जातलो.
तुर्कीत सगळ्यांत गिरेस्त लोक…
तुर्कीत गिरेस्त लोकांचो आंकडो वर्सुकी प्रमाणांत सगळ्यांत चड 9.7 टक्क्यांनी वाडलो. हाचे उपरांत अमेरिकेंत 7.9 टक्क्यांनी, भारतांत 6.1 टक्क्यांनी, दक्षीण कोरियांत 5.6 टक्क्यांनी आनी स्वित्झर्लंडांत 5.2 टक्क्यांनी गिरेस्त लोकांचो आंकडो वाडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
