भांगरभूंय | प्रतिनिधी
पणजीः फाटल्या कांय वर्सांत भारतान वेगवेगळ्या मळार आघाडी घेतल्या. प्रधानमंत्री नरेंद्र मोदी हांच्या फुडारपणा खाला खेळां क्षेत्रा खातीरय आधुनीक सुविधा दिवपाची वेवस्था सुरू आसा. फुडल्या कांय वर्सांत भारत जागतीक खेळां हब जातलो अशें मुख्यमंत्री डॉ. प्रमोद सावंत हांणी शुक्रारा पणजेंत जाल्ल्या फिडे बुद्धीबळ जागतीक करंडाच्या उक्तावण सुवाळ्यांत ते उलयताले. ह्या वेळार केंद्रीय खेळां मंत्री मनसुख मांडविया, खेळां मंत्री रमेश तवडकार, आरकाडा ड्रॉकोविच आनी हेर अधिकारी हाजीर आशिल्ले.
भारतांत खेळां मळार मुळाव्यो सुविधा निर्माण जावपाक लागल्या. म्हणून तरणाटे पिळगेक बरी संद मेळटा अशें मुख्यमंत्र्यांनी सांगलें. खेळां मळारय गोंय सरकार व्हड प्रमाणांत सुदारणा करीत आसा. ही सर्त घडोवन हाडल्यार बुद्धीबळ खेळाची लोकप्रियता वाडोवपाक मदत जातली. हाका लागून तरणाट्या खेळगड्यांक उर्बा मेळटली. बुद्धीबळ आनी जिवीत सादारणपणान एकूच आसता. बुद्धीबळांत तर्कशास्त्र, जिद्द आनी दूरदर्शनाची गरज आसता. जिणेंत येस मेळोवपाकय हे गूण गरजेचे आसतात. बुद्धी प्रमाण जिणेंतल्या आव्हानांक तोंड दिवपा खातीर योग्य निर्णय घेवचे पडटात.
ताणें म्हणलें, भारतांत बुद्धीबळ सुरू जालो त्या वेळार ह्या खेळाचें नांव चतुरंग आशिल्लें. देखून आयज भारतांत खास करून गोंयांत बुद्धीबळ जागतीक करंडाचें आयोजन जाता. हे सर्तींत 83 देशांतले 206 खेळगड्यांनी वांटो घेतला. खेळगड्याच्या हाजिरेक लागून गोंय हें एक सांस्कृतीक आनी बौद्धीक केंद्र जालां. सर्ती खातीर हांगा येवपी दरेकल्यान गोंयचो आनंद घेवचो. तशेंच, तांणी हांगाच्यान बऱ्यो यादी घेवन वचच्यो.
ऑलिंपिकाचें आयोजन
भारतांत हीसर्त 23 वर्सां उपरांत आयोजीत करतात अशें केंद्रीय मंत्री मनसुख मांडवीय हांणी सांगलें. आमचे खातीर खेळ ही फकत सर्त न्हय, ती एक संस्कृताय. खेळां मळार आमी फुडाकार घेतात. भारतांत 2030 वर्सा राष्ट्रकुल खेळ आनी 2036 वर्सा ऑलिंपिक सर्तीचें आयाेजन जातलें असो आमकां विस्वास आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
