भांगरभूंय | प्रतिनिधी
येजमान ऑस्ट्रेलिया पंगडान 474 धांवड्यांचो दोंगर उबारल्या उपरांत भारताचो मुखेली रोहीत शर्मा रोखडोच बाद जालो. पूण, विराट कोहली आनी यशस्वी जयस्वाल हाणें शेंकड्याची भागिदारी केली. भारत बरे स्थितींत येवपाक लागला अशें एका वेळार दिसपाक लागिल्लें. दोगूय बरी बॅटींग करताले. पूण, दुसऱ्या दिसाचो खेळ सोंपपाक फकत 16-17 मिणटां बाकी आसतना, अशें कितें घडलें की भारत परतून चेपणा खाला आयलो.
जयस्वालान मिड ऑनांत फिल्डरा कडेन ड्रायव्ह शॉर्ट खेळ्ळो आनी धांवड्यो करपाक धांवलो. पूण, धांवबाद जालो.कोहली जो 82 बॉलां मेरेन धैर्यान बॅटींग करतालो आनी ऑफ सायडी वयले शॉर्ट खेळपाक स्वताक पयस दवरपाक येसस्वी थारिल्लो. पूण, जयस्वाल बाद जाल्या उपरांत सातव्या -आठव्या स्टम्पा वयल्या बॉल मारपाचो यत्न करपाक लागलो आनी हातूंत तो विकेटकीपराच्या हातांत कॅच दिवन परतलो.
ते उपरांत फाटले मॅचींत भारताक फॉलोऑन करपा पसून वाटावपी आकाशदीप रोखडोच बाद जालो. हे मॅचींत साबार वेळार भारत येसस्वी रितीन पुनरागम करतलो अशें दिशिल्लें. पूण, ताका येस मेळूंक ना.
मजगतीं, ऑस्ट्रेलियेन एका वेळार 237 धांवड्यांचेर 2 विकेटी व्हगडायिल्ल्यो. पूण, ताचो स्कोर 5 बाद 246 असो जालो. पूण, आदलो मुखेली स्टीव स्मिथान सकयले सुवाते वयल्या बॅट्समनांक वांगडा घेवन आपल्या पंगडाचो स्कोर 474 मेरेन पावयलो.
ते उपरांत भारताच्या डावा वेळार लेगीत 2 बाद 51 वयल्यान 150 मेरेन पाविल्लो. पूण, खेळपट्टीचेर जम बसयिल्ले दोन बॅट्समन बाद जाल्ल्यान मॅच परतून येजमान पंगडा वटेन गेली.
दुसऱ्या दिसाचो खेळ सुरू जाल्या उपरांत स्मिथ आनी कमिन्स हाणें शेंकड्याची भागिदारी केली. जेवणाच्या विसवा मेरेन फकत एकूच विकेट पडली. ह्या सत्रांत ऑस्ट्रेलियेन 142 धांवड्यांची भर घाली. हे मजगतीं, स्मिथान आपलो शेंकडो लेगीत पुर्ण केलो. ह्या शेंकड्या सयत तो बॉर्डर-गावस्कर ट्रॉफींत सगल्यांत चड 10 शेंकडे मारपी पयलो बॅट्समन थारलो.
भारता वतीन फास्ट बॉलर जसप्रीत बुमरान चार विकेटी घेवपा खातीर 99 धांवड्यो खर्च केल्यो. ताचे खेरीत मोहम्मद सिराजान 23 ओव्हरींनी 122 धांवड्यो दिल्यो.
दुसऱ्या दिसाचो खेळ सोंपलो त्या वेळार भारतान 164 धांवड्यांचेर 5 विकेटी व्हगडायल्यात. ऋषभ पंत आनी रवींद्र जडेजा सध्या खेळपट्टीचेर आसात. भारताक संकश्टांतल्यान भायर सरपाक जाय जाल्यार हांकां बरी बॅटींग करची पडटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
