भांगरभूंय | प्रतिनिधी
पॅरीस ऑलिम्पिकांत भारताचो हॉकी पंगड आयज ग्रेट ब्रिटना आड आपली क्वॉर्टरफायनल खेळटलो. भारतान ब गटांत दुसरी जाल्यार ग्रेट ब्रिटनान अ गटांत तिसरी सुवात मेळयिल्ली. हे मॅची खेरीत बॅल्जियम आनी स्पेन, नॅदरलॅण्ड आनी ऑस्ट्रेलिया जाल्यार जर्मनी आनी अर्जेंटिना ह्या पंगडां मदीं हेर क्वॉर्टरफायनली मॅची जातल्यो.
तीन वर्सां पयलीं जाल्ले ऑलिम्पीक सर्तींत भारतान कांश्या पदक जिखिल्लें. 1980त मॉस्कोंत भांगरा पदक जिखल्या उपरांत ऑलिम्पिकांत भारताक हॉकी खेळांत पदक जिखपा खातीर 40 वर्सां वाट पळोवची पडली. 2021चे टोकियो ऑलिम्पीक क्वॉर्टरफायनलीचो आनी अंदूंचे ऑलिम्पिकाचो ड्रॉ समान आसा. भारतान त्या वेळार ग्रेट ब्रिटनाक 3-1 असो हारयिल्लो. पूण, सेमी फायनलींत ताका बॅल्जियमा कडल्यान हार घेवची पडिल्ली. कांश्या पदका खातीर जाल्ले लडतींत भारतान जर्मनी पंगडाक 5-4 फरकान हारयिल्लो. जर आयची मॅच भारतान जिखली तर सेमी फायनलींत तो जर्मनी आनी अर्जेंटिना हांच्या मदल्या जैतिवंत आड खेळटलो.
हरमनप्रीत सिंगाच्या फुडारपणाखाला खेळपी भारत सध्या फॉर्मांत आसा. पयले मॅचींत ताणें न्युझिलॅण्डाक 3-2 असो हारयलो. अखेरच्या मिनटाक हरमप्रीत सिंगान गोल करून भारताक जैत मेळोवन दिलें. अर्जेंटिना आडची मॅच अखेरच्या खिणाक 1-1 अशी बादाबाद उरली. ते उपरांत भारतान आयर्लेण्डाक 2-0 हारयलो. भारताची ही जैताची धांव बॅल्जियमान (2-1) आडायली. पूण, ताची भरपाय ऑस्ट्रेलिये आडचे (3-2) मॅचींतल्यान केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
