भांगरभूंय | प्रतिनिधी
ऑस्ट्रेलिया पंगडान तिसरे आनी निमाणे वन डे मॅचींत येजमान भारताक 66 धांवड्यांनी हारयलो. हे हारीक लागून ऑस्ट्रेलिये आड क्लीन स्विप करपाचें भारताचें सपन भंगलें. भारतान पयल्यो दोन मॅची जिखून माळ पयलींच आपल्या बोल्सांत घाल्ली.
ऑस्ट्रेलियेन काल कसलेंच चेपण घेनासतना खेळ केलो. ताणें पयलीं बॅटींग करतना मिचेल मार्श, डॅव्हिड वॉर्नर, स्टिव स्मिथ आनी मार्नस लाबशेन हांच्या अर्द शेंकड्यां नेटार 7 विकेटी वगडावन 352 धांवड्यो केल्यो. मोखीचो फाटलाव करपी भारतान 49.4 ओव्हरींनी सगल्यो विकेटी वगडावन 286 धांवड्यो केल्यो. भारता वतीन रोहित शर्मान 81, विराट कोहलीन 56 आनी श्रेयस अय्यरान 48 धांवड्यो केल्यो.
राजकोटाच्या सौराष्ट्र असोसिएशनाच्या स्टेडियमाचेर पयलीं बॅटींग करतना डॅव्हिड वॉर्नर आनी मिचेल मार्श हाणें ऑस्ट्रेलियेक बरी सुरवात करून दिली. वॉर्नरान 32 बॉलांनी अर्द शेंकडो मारलो. पूण, 55 धांवड्यांचेर प्रसिद्ध कृष्णाच्या बॉलाचेर विकेटकीपर लोकेश राहुलाक कॅच दिली. मिचेल मार्शाक (96) शेंकडो चार धांवड्यांनी चुकलो. कुलदीप यादवाच्या बॉलाचेर प्रसिद्ध कृष्णान ताची कॅच धरली. ही एक सोंपी कॅच आशिल्ली.
मार्श बाद जावचे पयलीं ऑस्ट्रेलिया 400 धांवड्यांचो आंकडो सहज हुपतलो अशें दिशिल्लें. पूण, तो बाद जाल्या उपरांत परिस्थिती बदल्ली. मार्शा उपरांत स्मिथ चड वगत खेळपट्टीचेर तग धरपाक जमलो ना. सिराजाचे बॉलिंगेचेर तो एलबीडब्ल्यू बाद जालो. ताणें 61 बॉलांनी 8 चवके आनी एक सक्याचे मजतीन 71 धांवड्यो केल्यो. एलेक्स केरी, ग्लॅन मॅक्सवॅल आनी कॅमरून ग्रीन हाणें वळेरेन 11, 5 आनी 9 धांवड्यो केल्यो. केरी आनी मॅक्सवॅल हे जसप्रीत बुमराचे शिकार थारले, जाल्यार ग्रीनाची विकेट कुलदीप यादवान घेतली.
मोखीचो फाटलाव करपी भारतान बरी सुरवात केली. रोहितान आकर्शक शॉर्ट खेळून 32 बॉलांनी अर्द शेंकडो पुर्ण केलो. ताच्या वांगडा डावाची सुरवात करपाक आयिल्ल्या वॉशिंग्टन सुंदरान 30 बॉलांनी 18 धांवड्यो करून तंबूची वाट धरली. सुंदर बाद जाल्या उपरांत लेगीत रोहितान एके वटेच्यान आक्रमक बॅटींग करप चालूच दवरली. पूण, अखेरे 81चेर तो बाद जालो. त्या वेळार पंगडाचो स्कोर 144 आशिल्लो. ते उपरांत विराट कोहली लेगीत 56 धांवड्यो करून बाद जालो. लोकेश राहुलान श्रेयस अय्यरा वांगडा मेळून डाव मुखार व्हेलो. पूण, 37वे ओव्हरींत राहुल 28 धांवड्यो करून बाद जालो.
सुर्यकुमार यादव वैयक्तीक 8 धांवड्यांचेर जोश हेजलवुडाचो शिकार थारलो. मॅक्सवॅलान अय्यराक बोल्ड केलो. अय्यरान बाद जावचे पयलीं 43 बॉलांनी दोन सक्यांचे मजतीन 48 धांवड्यो केल्यो. कुलदीपाक (2) हेजलवुडान बोल्ड केलो. ते उपरांत पंगडाची सगली आस्त रवींद्र जडेजाचेर आशिल्ली. पूण, ताका व्हड खेळी करपाक जमली ना. तो 36 बॉलांनी 35 धांवड्यो करून बाद जालो. बुमरा 5 आनी मोहम्मद सिराज 1 धांवडी करून बाद जाले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
