भारत क्लीन स्वीप करपाक इत्सूक

भांगरभूंय | प्रतिनिधी

पयल्यो दोनूय मॅची जिखून निर्णायक आघाडी घेवपी येजमान भारत आयज तिसरे आनी निमाणे वन डे मॅचींत श्रीलंकेक हारोवन क्लीन स्वीप करपाक इत्सूक आसतलो.

हे मॅची खातीर मुखेली रोहित शर्मा बॅटींग लायन अपांत व्हड बदल करपाक इत्सूक आसचो ना.पूण बॉलिंगेंत पर्यायांचो उपेग करपाक शकता.

भारतान गुवाहाटींत जाल्ली पयली मॅच सहज जिखल्या उपरांत कोलकातांत जाल्ले दुसरे मॅचींत जैताचो फाटलाव करतना भारताचो सुरवातीचो क्रम गडगडील्लो. पूण, लोकेश राहुलाचे संयमी बॅटिंगे नेटार भारतान माळ जिखिल्ली. निमाणे मॅचींत लेगीत जैताचो क्रम चालू दवरपाक खेळगडे इत्सूक आसतले.

हे मॅची उपरांत 72 वरां परस उण्या वेळांत न्युझिलॅण्डा आड खेळटलो. आनी श्रीलंके आडची माळ 3-0 फरकान जिखून न्युझिलॅण्डा आड खेळपाक भारताच्या खेळगड्यांचो आत्मविस्वास वाडिल्लो आसतलो.

वर्कलोड मॅनेजमॅण्टाचे आपले कांय फायदे आसले तरी ताचें कांय लुकसाणां आसात. जसो एका खेळगड्याक विसव दिलो जाल्यार ताची लय वता.

हांगाच्या ग्रीनफिल्ड स्टेडियमाची खेळपट्टी फास्ट बॉलरांक मजत करपी आशिल्ल्यान पंगड वेवस्थापन चारा बदला पांच बॉलरांक खेळोवपाक शकता.

भारत 14 दिसां भितर स वन डे मॅची खेळटलो. ताका लागून फास्ट बॉलर मोहम्मद शमीचेर चड चेपण येवपाक शकता. बीसीसीआय खातीर हो एक हुस्क्याचो विशय आसा. जसप्रीत बुमराचे गैरहाजेरेंत ऑस्ट्रेलिये आडचे बॉर्डर-गावस्कर ट्रॉफींत भारताच्या आक्रमणाची जापसालदारकी शमीचेरूय येतली. तो पुर्ण तंदुरुस्त उरता जाल्यार ऑस्ट्रेलिये आडचे चार टॅस्टींनी ताच्या कडल्यान सुमार 125 ते 130 ओव्हरी घालपाची आस्त आसा.

दावखुरो मध्यमगतीचो बॉलर अर्शदीप सिंगाक विवीधताये खातीर वापरपाक शकता. खेळपट्टी अनुकूल थारता जाल्यार तो अर्शदीप पंगडा खातीर फायदेशीर थारुये. फाटले मॅचींत मॅन ऑफ द मॅच पुरस्कार जिखपी कुलदीप यादवाक जखमी युजवेंद्र चहलाचे सुवातेर खेळयिल्लो. पूण, आयचे मॅची खातीर चहल तंदुरुस्त जाता जाल्यार कोणांक खेळतले हें पळोवपा सारकें आसतलें.

अक्षर पटेल न्युझिलॅण्डा आडचे माळे खातीर वैयक्तीक कारणांक लागून विसव घेतलो. न्युझिलॅण्डा आडचे माळे खातीर वॉशिंग्टन सुंदराक खेळोवपाक सोदता जाल्यार आयची मॅच ताचे खातीर आदर्श थारतली.

इशान किशन डावाची सुरवात करपाक घटमूट दावेदार आसा. ताका लागून ओपनर शुभमन गिल आपलो फॉर्म आयचे मॅचींत लेगीत कायम राखपाक इत्सूक आसतलो.