भांगरभूंय | प्रतिनिधी
मुखेली सुनील छेत्रीच्या उत्कृश्ट प्रदर्शना उपरांत लेगीत भारताक सॅफ फुटबॉल वस्तादपण सर्तीचे आपल निमाणे ग्रुप मॅचींत कुवेटान 1-1 असो बरोबरींत आडायलो.
छेत्रीन पयल्या अर्दाच्या इंज्युरी टायमांत गोल करून भारताचें खातें उगडिल्लें. पूण, दुसऱ्या अर्दाच्या अतिरिक्त वेळांत अन्वर अलीच्या आत्मघातकी गोलाचो भारताक फटको बसलो.
भारत आनी कुवेट दोनूय पंगडांचे दरेकी सात गूण जाल्यात. पूण, बऱ्या गोल सरासरीच्या नेटार कुवेटान पयली सुवात मेळयली. भारत आतां सेमी फायनलींत लेबनान पंगडा आड खेळटलो.
दोनूय पंगडांनी आदींच सेमी फायनलींतली सुवात निश्चीत केल्ली. दोनूय पंगडांनी पयल्या अर्दांत आक्रमक खेळ केलो. भारतान दोनूय विगांतल्यान आक्रमण केलें. सव्या मिनटाक तो गोल करपाक सामको लागीं पाविल्लो. पूण, आकाश मिश्राच्या क्रॉसाचेर छेत्रीचो बॉलाचेर योग्य रितीन संपर्क जावंक ना. 35व्या मिनटाक भारताक परतून संद मेळ्ळी. पूण, अनिरुद्ध थापाच्या कॉर्नराचेर अन्वर अलीचो हेडर फुकट गेलो. सेगीत हल्ले केल्ल्याचो फायदो भारताक इंज्युरी टायमांत जालो. थापाच्या पासाचेर छेत्रीन उत्कृश्ट गोल केलो.
छेत्रीचो सर्तींतलो पांचवो आनी सॅफ वस्तादपण सर्तींतलो 26वे मॅचींतलो 24वो गोल थारलो. मजगतीं, भारताचो मुख्य प्रशिक्षक इगोर स्टिमकाक सर्तींत दुसरे खेपे रॅड कार्ड मेळ्ळें. तो अधिकाऱ्यां कडेन बाचाबाची करतना सांपडलो आनी 81व्या मिनटाक ताका रॅड कार्ड दाखयलें. हाचे आदीं पाकिस्ताना आडचे मॅची वेळारूय ताका रॅड कार्ड मेळिल्लें. भारताच्या रहीम अली आनी कुवेटाच्या अल कल्लाफाक लेगीत रॅड कार्ड दाखयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
