भांगरभूंय | प्रतिनिधी
भारतीय बायलांचो ए पंगड सध्या ऑस्ट्रेलियेचे भोंवडेर आसा. थंय तो येजमान पंगडा आड तीन मॅचींची टी-20 माळ चालू आसा. दुसरे मॅचींत भारत अ पंगडाक 114 धांवड्यांनी हार घेवची पडली.
भारताची मुखेली राधा यादव हिणें टॉस जिखून पयलीं ऑस्ट्रेलिया अ पंगडाक बॅटींग करपाचें आमंत्रण दिलें. पूण, तिचो हो निर्णय पंगडाक म्हारग पडलो. ऑस्ट्रेलिया अ पंगडान निर्धारीत 20 ओव्हरींनी 4 विकेटी व्हगडावन 187 धांवड्यांचो दोंगर उबारलो. ताचो फाटलाव करपी भारत अ पंगडाचो डाव 15.1 ओव्हरींनी फकत 73 धांवड्यांचेर सोंपलो.
188 धांवड्यांचे मोखीचो फाटलाव करपाक मैदानांत देंवपी भारत अ पंगडाची सुरवात सामकी बाबत जाली. शेफाली वर्मा कडल्यान पंगडाक व्हड खेळीची आस्त आशिल्ली. पूण, तिणें फकत पांच बॉलांक तोंड दिवन 3 धांवड्यो करून तंबूंत परतली. तिचे खेरीत उमा छेत्रीक आपलें खातें लेगीत उगडपाक जमलें ना. राघवी बिष्ट लेगीत फकत 5 धांवड्यांची खेळी करून परतीची वाट धरली. भारताच्या डावांत फकत दोनूय बॅटरांक दोट्टी आंकडो हुपपाक जमलो. दिनेश वृंदा हिणें 21 आनी मिनू मानी हिणें 20 धांवड्यांची खेळी केली.
ऑस्ट्रेलिया अ वतीन किम गार्थ हिणें जबरदस्त बॉलींग केली. तिणें 3 ओव्हरींनी फकत 7 धांवड्यो दिवन 4 विकेटी मेळयल्यो. ते पयलीं ऑस्ट्रेलिया वतीन एलिसा हिली हिणें आपल्या पंगडाक व्हड धांवसंख्या उबारून दिवपाक मोलादीक योगदान दिलें. तिणें 44 बॉलांनी 12 चवक्यांचे मजतीन 70 धांवड्यांची खेळी केली. तिचे खेरीत ताहलिया विल्सन हिणें 43 धांवड्यांचें योगदान दिलें. भारत अ वतीन राधा यादव हिणें 2 जाल्यार प्रेमा रावत हिणें एक विकेट घेतली. माळेंतली तिसरी आनी निमाणी मॅच आयज ह्याच मैदानाचेर जातली.
पयले मॅचींत लेगीत भारताक हार घेवची पडिल्ली. भारतान पयली मॅच 13 धांवड्यांनी व्हगडायिल्ली. येजमान पंगडान पयलीं बॅटींग करतना 6 विकेटी व्हगडावन 137 धांवड्यो केल्ल्यो. ताचो फाटलाव करतना भारताक 124 धांवड्यां मेरेन मजल मारप शक्य जाल्लें. हे मॅचींत लेगीत शेफाली आनी उमा हांणी निर्शेणी हाडिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
