भांगरभूंय | प्रतिनिधी
वॉशिंगटन, नवी दिल्ली, खबरां संस्था: अमेरिकी वस्तूंचेर व्हडा प्रमाणांत आयात कर घालपी भारतान आपलो दर खूब उणो करपाची मान्यताय दिल्या असो दावो अमेरिकेचे अध्यक्ष डोनाल्ड ट्रम्प हांणी केला. तांच्या ह्या विधानाक लागून भारतांत राजकी वाद निर्माण जाला.
ओव्हल कार्यालयांतल्यान उलयतना ट्रम्प हांणी सांगलें, संवसारभरांत भारत आमचे कडल्यान व्हड प्रमाणांत शुल्क घेता. पूण आतां आमी तांचें धोरण उक्ते केल्या उपरांत निमाणे तांणी आयात दर उणें करपाचें मान्य केलां. वाणिज्य मंत्री पीयूष गोयल वेपाराचेर चर्चा करपाक वॉशिंग्टनांत आसतना ट्रम्प हांणी हो दावो केल्ल्यान ट्रम्प हांच्या ह्या दाव्याक लागून वाद निर्माण जाला.
मजगतीं, ट्रम्प हांणी दावो केल्ले प्रमाण सरकारान खरेंच आयात दर उणो करपाचो निर्णय घेतला काय कितें? असो प्रस्न कॉंग्रेस पक्षान शेनवारा केंद्र सरकाराक केला. ह्या विशयाचेर संसदेक विस्वासांत घेवपाचो उलो कॉंग्रेसीन प्रधानमंत्री नरेंद्र मोदी हांकां मारला.
अमेरिकेच्या चेंपणाक भियेवन आनी आयात कर उणो करून मोदी सरकारान भारतीय शेतकार आनी सूक्ष्म, ल्हान आनी मध्यम उद्देजकांचें हित सोडून दिलां काय कितें असो प्रस्न कॉंग्रेसीचे सरचिटणीस जयराम रमेश हांणी ‘एक्सा’चेर पोस्टांत केला.
भारत आमचेर व्हड आयात कर लादता. पूण आतां निमाणें तांकां कळ्ळां की कोण तरी तांचें धोरण उक्ते करता. ते खातीर आयात कर खूब उणे करपाचें मान्य केलां, अशें ट्रम्प हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
