भांगरभूंय | प्रतिनिधी
भारत आनी येजमान आयर्लेण्ड ह्या पंगडां मदीं तीन टी-20 माळेंतली पयली मॅच आयज डबलीनांत जातली. भारता खातीर ही माळ म्हत्वाची आसा.
पंगड वेवस्थापना खेरीत निवड समितीची युवा खेळगड्यांच्या प्रदर्शनाचेर नदर आसतली.
आशिया करंड सर्ती खातीर हे माळे वरवीं खेळगड्यांची तंदुरुस्त समजतली. जसप्रीत बुमरा, प्रसिद्ध कृष्णा सारके फास्ट बॉलर दुखापती उपरांत पुनरागमन करतात. हे माळे वरवीं बुमराच्या फुडारपणाचो लेगीत कस लागतलो.
वॅस्ट इंडिजाचे भोंवडेर यशस्वी जयस्वाला वांगडा डावाची सुरवात करपी शुभमन गिलाक माळे खातीर विसव दिला. ताका लागून यशस्वी वांगडा उप मुखेली ऋतुराज गायकवाड डावाची सुरवात करुये. यशस्वी सयत गायकवाडाक लेगीत स्वताक सिद्ध करपाची संद आसा. यशस्वीन वॅस्ट इंडिजा आड दोन मॅचींनी खेळटना 45चे सरासरीन धांवड्यो केल्यात. गायकवाडान अंदूंचे आयपीएलांत जबरदस्त प्रदर्शन करून राष्ट्रीय पंगडांत परतून सुवात मेळयल्या.
तिसरे सुवाते खातीर संजू सॅमसनाक खेळोवपाक शकता. स्वताक सिद्ध करपा खातीर संजू कडेन ही निमाणी संद थारुये. विकेटकीपर म्हणून जितेश शर्माक लेगीत संद दिवपाक शकता. चवथे सुवातेर तिलक वर्माक खेळोवपाक शकता. वॅस्ट इंडिजा आड पदार्पण करपी तिलक वर्मान पांच टी-20 मॅचींनी खेळटना सुमार 58चे सरासरीन 173 धांवड्यो केल्यात. ताची स्ट्रायक रेट लेगीत 140च्या वयर आसा.
पांचवे सुवाते खातीर पंगड वेवस्थापन रिंकू सिंगाक संद दिवपाक शकता. हे भोंवडे वरवीं तो पदार्पण करपाक शकता. रिंकून आयपीएलांत कोलकाता नायट रायडर्सा वतीन खेळटना कांय आकर्शक खेळी केल्ल्यो. ताच्याच नेटार कोलकातान साबार खेपे जैत मेळयिल्लें.
अश्टतासांचे खेळगडे म्हणून शिवम दुबे आनी वॉशिंग्टन सुंदर हांकां संद दिवपाक शकतात. शिवम दुबे फास्ट बॉलर अश्टतासांचो खेळगडो आसा, जाल्यार वॉशिंग्टन सुंदर स्पिन बॉलर ऑलरावण्डर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
