भांगरभूंय | प्रतिनिधी
नवी दिल्ली, खबरां संस्था: केंद्र सरकारान मंगळारा सांगलें, जपानाक फाटीं उडोवन भारत संवसारांतलो चवथो सगल्यांत व्हड अर्थव्यवस्था जाला. भारताचे अर्थवेवस्थेचो आकार अदमासान ४.१८ ट्रिलियन डॉलर (सुमार रु. ३७४.५ लाख कोटी) इतलो आसा.
केंद्राच्या अदमासा प्रमाण, सध्याची गती कायम उरल्यार २०३० मेरेन भारताचें सगलें देशा भितरलें उत्पादन ७.३ ट्रिलियन डॉलर (सुमार छरु. ६४९.७० लाख कोटी) मेरेन पावपाक शकता. अशें जाल्यार भारत जर्मनीकूय फाटीं उडयतलो. सध्या अमेरिका संवसारांतली सगल्यांत व्हड अर्थववेस्था आसा. चीन दुसर्या आनी जर्मनी तिसर्या नंबराचेर आसा.
सरकारच्या निवेदना प्रमाण, भारत सध्या संवसारांतली सगल्यांत वेगान वाडपी मुखेल अर्थवेवस्थे मदली एक जावन आसा. चालू अर्थीक वर्स २०२५-२६ च्या दुसर्या तीन म्हयन्यांत भारताचो जीडीपी दर ८.२% आशिल्लो. त्यान पयलीं पयल्या तीन म्हयन्यांत तो ७.८% आनी फाटल्या अर्थीक वर्साच्या चवथ्या तीन म्हयन्यांक ७.४% आशिल्लो.
जीडीपी म्हणल्यार कितें?
अर्थवेवस्थेचे भलायकेचो आढावो घेवपा खातीर जीडीपीचो वापर करता. ह्या देशा खाला एका निश्चीत वेळार तयार केल्लें सगळें सामान आनी सेवेचे मोल दाखयता. हातूंत देशाचे शिमे भितर रावन परदेशी कंपनीं जें उत्पादन करतात, तांचोय आसपाव करतात.
जीडीपी दोन तरेची आसता
जीडीपी दोन तरेची आसता. सारकी जिडीपी आनी नांवा पुरती जिडीपी. सारके जिडीपींत सामान आनी सेवांच्या मुल्ल्यांची गणना आधारभूत वर्साच्या मुल्याचेर वा स्थिर किमतीचेर करतात. सध्या जीडीपीची गणना करपा खातीर आधारभूत वर्स २०११-१२ आसा. जाल्यार नाममात्र जीडीपीची गणना सध्याचे किमतीचेर करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
