भांगरभूंय | प्रतिनिधी
दक्षीण कोरियाच्या बुसान शारांत जाल्ले आशियायी कबड्डी वस्तादपण सर्तीचें भारतान वस्तादपण जोडलें. फायनलींत ताणें इराणाक 42-32 फरकान हारोवन आठवे खेपे आशियायी कबड्डी सर्त जिखली. भारताच्या पंगडाचो मुखेली पवन शेरावतान सुपर 10 पॉयण्ट्स मेळयत जैत जोडून दिवपाक मोलादीक योगदान दिलें.
मॅचीच्या पयल्या पांच मिनटांनी भारतान प्रतिस्पर्धी पंगडाचेर आपलो शेक दवरिल्लो. ते उपरांत मॅचीच्या 10व्या मिनटाक इराणाचो पंगड बाद जालो. पवन शेरावत आनी अस्लम इनामदार हाणें येसस्वी रेड केल्ली. तशेच कांय टॅकल पॉयण्ट लेगीत मेळयले.
हे उत्कृश्ट सुरवाती उपरांत भारताच्या पंगडान आपली आघाडी सहज रितीन वाडयली. भारतान अश्टतासांचें प्रदर्शन केलें. इराणाक कांय बोनस गूण लेगीत मेळ्ळे. पूण, मॅचीच्या 19व्या मिनटाक भारतान परत एकदा प्रतिस्पर्धी पंगड बाद केलो.
पयल्या हाफा मेरेन भारत 23-11 असो मुखार आशिल्लो. पूण, इराणाचो मुखेली मोहम्मदरझा शादलोई चियानेह हाणें 29व्या मिनटाक दोन रॅड पॉयण्ट आनी सुपर रेडच्या नेटार भारताचो डाव सोंपयलो. मॅच सोंपपाक दोन मिनटां बाकी आसतना इराणान भारताची आघाडी 38-31 अशी उणी केली.
पूण, चेपणाचें वातावरण आसून लेगीत भारतान मॅच 42-32 अशा फरकान जिखून आपलें आठवें वस्तादपण निश्चीत केलें. आशियायी कबड्डी वस्तादपण सर्तीचे णव हंगाम जाल्यात आनी हातूंत आठ खेपे भारतान वस्तादपण जोडलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
