भांगरभूंय | प्रतिनिधी
भारत अ आनी ऑस्ट्रेलिया अ ह्या पंगडां मदीं हांगाच्या मॅलबॉर्न क्रिकेट मैदानाचेर चार दिसांची अनधिकृत टॅस्ट मॅच सुरू जाली. भारताचो पयलो डाव फकत 161 धांवड्यांचेर सोंपलो. सात बॅट्समनांक दोट्टी आंकडो लेगीत हुपपाक जमलो ना. भारताचो सिनीयर पंगड टॅस्ट माळ खेळपाक ऑस्ट्रेलियेचे भोंवडेर वचपाचो आसा, ताची तयारी म्हणून बीसीसीआयन लोकेश राहुल आनी ध्रुव जुरेल हांकां पयलींच थंय धाडल्यात. तांकां भारत अ पंगडा वतीन खेळपाची संद लेगीत मेळ्ळी. पूण, लोकेश राहुल फकत चार धांवड्यांचेर बाद जालो. भारताचो अर्दो पंगड 65 धांवड्यांचेर तंबूंत परतून गेल्लो, अशा वेळार विकेटकीपर बॅट्समन ध्रुव जुरेलान (80) एक बाजू सांबाळून धरली. ताका शेंकडो चुकलो पूण, ताचेच खेळीक लागून भारताक 150च्या मुखार मजल मारप शक्य जालें.
ऑस्ट्रेलिया अ पंगडान टॉस जिखून पयलीं भारत अ पंगडाक बॅटींग करपाचें आमंत्रण दिलें. ताचो हो निर्णय योग्य थारलो. भारताचे चार बॅट्समन फकत 11 धांवड्यांचेर तंबूंत परतून गेल्ले, अभिमन्यु ईश्वरन (0), साई सुदर्शन (0), लोकेश राहुल (4) आनी ऋतुराज गायकवाड (4) अपेशी थारले. ते उपरांत देवदत्त पडिक्कल आनी ध्रुव जुरेल हांणी पांचवे विकेटी खातीर 53 धांवड्यांची भागिदारी केली. देवदत्त (26) बाद जाल्ल्यान ही जोडी फुटली. अशे तरेन भारताची अवस्था 5 बाद 64 अशी जाली. नितीश कुमार रेड्डी (16) आनी तनुष कोटियन (0) आनी खलील अहमद (1) हांकां बीयू वेबस्टरान बाद करून भारताक 119 धांवड्यांचेर 8 धपके दिले. ध्रुवान एक बाजू सांबाळून धरली आनी ताच्या अर्द शेंकड्यान भारताक थाकाय मेळ्ळी.
अखेरेक 55वे ओव्हरींत नॅथन मॅक्स्विनीचे स्पिन बॉलिंगेचेर सको मारपाच्या यत्नांत ध्रुव बाद जालो. ताणें 186 बॉलांक तोंड दितना 80 धांवड्यो केल्यो. ताणें स चवके आनी दोन सके मारले. प्रसिद्ध कृष्णा आनी मुकेश कुमार हांणी लेगीत धांवसंख्या मुखार व्हरपाक हातभार लायलो. पूण, भारताचो डाव अखेरेक 161चेर सोंपलो.
पयल्या दिसाचो खेळ सोंपलो त्या वेळार ऑस्ट्रेलिया अ पंगडान 17.1 ओव्हरींनी 2 विकेटी व्हगडावन 53 धांवड्यो केल्यात. तो अजून 108 धांवड्यांनी फाटीं आसा. मुकेश कुमार आनी खलील अहमद हाणें एकेक विकेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
