भांगरभूंय | प्रतिनिधी
यास्तिका भाटियाचो अर्द शेंकडो आनी मुखेली राधा यादव हिच्या फुडारपणाखाला बॉलरांनी केल्ल्या उत्कृश्ट प्रदर्शना नेटार भारतीय बायलांच्या अ पंगडान येजमान ऑस्ट्रेलियेच्या बायलांच्या अ पंगडा आड 48 बॉल आनी 3 विकेटी राखून जैत जोडलें. ह्या जैतान भारत अ पंगडान तीन मॅचींचे वन डे माळेंत 1-0 अशी आघाडी घेतली.
दावखुरी स्पिनर राधा यादव हिणें 45 धांवड्यो दिवन 3 विकेटी घेतल्यो. तिच्या ह्या प्रदर्शनाच्या नेटार ऑस्ट्रेलिया अ पंगडाचो डाव 47.5 ओव्हरींनी 214 धांवड्यांचोर आडावप भारत अ पंगडाक शक्य जालें. भारतीय अ पंगडान ते उपरांत 42 ओव्हरींनी मोख मेळयली.
भाटियान शेफाली वर्मा (36) मेळून डावाची बरी सुरवात केली. तांणी पयले विकेटी खातीर फकत 10.4 ओव्हरींनी 77 धांवड्यांची भागिदारी केली. शेफाली ही सियाना जिंजराचे बॉलिंगेचेर बाद जाली. ते उपरांत भाटिया हिणें धारा गुज्जर हिच्या वांगडा मेळून दुसरे विकेटी खातीर 63 धांवड्यांची भागिदारी केली. धारान 53 बॉलांनी 31 धांवड्यो केल्यो. भारतान 23.3 ओव्हरींनी 1 विकेट व्हगडावन 140 धांवड्यो केल्ल्यो. पूण, धारा आनी भाटिया रोखडींच बाद जाल्या उपरांत भारत अ चो स्कोर 3 बाद 157 असो जालो. ऑफ स्पिनर एला हेवर्डान उपरांत 30वे आनी 32वे ओव्हरींत तेजल हसब्निस आनी तनुश्री सरकार हांकां बाद केलीं. ताका लागून भारत अ पंगडाचो स्कोर 5 बाद 166 असो जालो.
राघवी बिष्ट (नाबाद 25) हिणें अशा कठीण वेळार जापसालदारकी सांबाळ्ळी आनी पंगडाक मोखी मेरेन व्हरपाक म्हत्वाची भुमिका वठयली.
ते पयलीं अनिका लियरयोड (नाबाद 92) आनी रशेल ट्रेनमॅन (51) हांच्या अर्द शेंकड्यां उपरांत लेगीत ऑस्ट्रेलिया अ पंगडाक व्हड स्कोर उबारपाक अपेस आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
