भांगरभूंय | प्रतिनिधी
कांय वर्सां भितरूच भारत म्हणजेच इंडिया संवसारांतली व्हडली अर्थीक महासत्ता जातली म्हणपाचें सपन सद्याक सगळेच पळेतात. सद्याक आमी तिसऱ्या नंबराचेर पावल्यात म्हणपाचें आयकूंक मेळटा. म्हणजेच फुडल्या कांय वर्सां भितर आमी दोन आनी उपरांत एका नंबराचेर पावतले हातूंत मात्तूय दुबाव दवरपाची गरज ना. मोदी आसा थंय कांयच अशक्य ना म्हणपाचें सगळेच मानूंक लागल्यात. भारत अर्थीक महासत्ता जातली हें मोदीचें सपन आमीय पळोवंक लागल्यात. कित्याक जावंचें ना हें सपन साकार?
पूण अशें म्हणटात, ‘मना सारकें घडत तर साडेसाती कित्याक नडत?’ पयरूच विश्वचशक क्रिकेट सर्त जाली. एकूय मॅच हारनासतना आमी फायनलींत पावले. अंदू आमी जिखतलेच म्हणपाचें सपन असंख्य लोकांनी पळेल्लें. निमणी सर्त गुजरातांत मोदी स्टेडियमाचेर. देशांतलो सगळ्यांत व्हड स्टेडियम. देड लाख लोक जमिल्ले. तातूंत अमीत शहा आनी मोदीसायबूय ‘आँखो देखा हाल’ पळेताले. देशांत सगळ्यांनी देवांक उदकांत बुडोवन दवरिल्ले. होम हवनांय जाल्लीं. आमकांय दिशिल्लें, ‘मोदी है तो… ’ पूण कितें जालें तें आमी पळेलें. हाचोच अर्थ फायनलींत पावनूय कप हातांत मेळटलोच हाचो भरंवसो कोणाच्यानूच दिवंक जायना.
मोदी स्टेडियमाचेर जे लोक जमिल्ले ते पळेल्यार आमच्या लोकांची आस्पत कळटा. चाळीस हजार ते देड लाख खर्चून जांकां मॅच पळोवप शक्य आसा तें पळेल्यार देश खर्यांनीच अर्थीक महासत्ते वटेन पावलां मारता म्हणपाचें दिसता. हांगा फकत स्टेडियमार वचपाचोच खर्च ना जाल्यार रावपाचो आनी येवपा वचपाचोय खर्च आसा. हांगच्या हाॅटेलाचे मॅची वेळावेले दर पळेल्यार दोळे घुंवपाचे. तरी आसतना लोक थंय पावले. हाचोच अर्थ देशांत सुबत्ता आसा. पूण हें चित्र जर खरें जाल्यार दर वर्सा हजारांनी शेतकार आत्महत्या कित्याक करतात? कांदे शंबरांचेर पावले, बटाटान पन्नाशी गांठली आनी टोमाट तांबडें जावन पळेता म्हणून बोवाळ कित्याक जाता? फेरिबोटींत दुचाकींक तिकेट लायली वा चारचाकीची तिकेट वाडयली जाल्यार लोक सरकाराक कित्याक खेपतात? दरवाड फाटीं कित्याक घेवंची पडटा? खंयचें चित्र खरें? चाळीस हजार ते देड लाख दिवन तिकेट घेवपी आनी लाख रुपया खर्चून होटॅलांत रावपी लोक खरे काय हे आंदोलनां करून तिकेट माफ करून घेवपी लोक खरे?
जर आमचो देश अर्थीक महासत्ता जातलो जाल्यार देशांतले लोक पयलीं गिरेस्त जावचे पडले. जेन्ना लोकांची तांक लाखांनी मोडपाची जातली, जशे विश्वकपाक लाख मोडून गेले तेन्नाच अर्थीक महासत्तेचें सपन आमी पळोंवक पावतले. पूण जेन्ना लोकांक सगळेंच फुकट जाय जाता, तांची तांक तिकेट दिवपाची वा धान्य विकतें घेवपाची आसना तेन्ना देश अर्थीक नदरेन समृद्ध कसो जातलो? अर्थीक महासत्ते दिकेन पावलां कशीं मारतलो? अंबानी आनी अडानी जोडटले आनी देशाक महासत्ता करतले हें कशें मानपाचें?
ह्या विश्वचशकाच्या बोवाळांत एके व्हडले गजालीचेर आमची नदर गेली ना. खऱ्यांनीच व्हडली गजाल ती. भरपूर प्रसिद्धी मेळूंक जाय आसली ते गजालीक. काब्राल गेलो आनी सिक्वेर आयलो ही न्हय. अशे जायते येतले आनी वतले, पूण आमी जेन्ना अर्थीक महासत्ता जावचेलें सपन पळेतात तेन्ना हे गजालीचेर आडनदर करूंक मेळचिना. ही गजाल म्हणल्यार एका वेळार व्हड उद्योजक म्हणून नांव मेळयल्लो आनी कोट्यांनी लोकांक ‘बेसहारा’ करून सोडिल्लो सहारा इंडियाचो मुखेली सुब्रत रॉय संवसाराक अंतरलो. णव कोटी सामान्य लोकां कडल्यान पयशे पुंजावन तांचो सहारा म्हणून दाखोवपी बेवारस जावन गेलो. कितें कितें म्हूण केलें ना ह्या मनशान. अडाणी शेतकारां कडल्यान पयशे पुंजायले. घरांचे प्रकल्प उबारले. आपलें नांव जावचें आनी सत्ताधाऱ्यां वांगडा इश्टागत करूंक मेळची म्हणून क्रिकेटींतलें कांयच खबर नासतना भारतीय पंगडाचो स्पॉंसरर जालो.
पूण सगळेच दीस सारके आसनात. फटींगपणां केन्नातरी भायर सरताच. हाचींय सरलीं. सेबीन जेन्ना हाचे कडेन दुडवांचो हिशोब मागलो हाणें कितलेशेच ट्रक भरून कागदां धाडलीं. ताचो समज जाल्लो हीं कागदां पळोवन सेबी बें म्हणटले. पूण थंय आशिल्ल्या प्रामाणीक ऑफिसरांनी ताका सडीक दिलें. प्रकरण कोर्टांत पावलें. लोकांचे पयशे दिवप हाका शक्य जालें ना. ताणे ते पयशे परते दिवंक घेतिल्ले तर? जेन्ना लोकांक पयशे परत घेवंक अर्ज करूंक सांगलें तेन्ना तीन कोटींतल्या फकत साडेचार हजार लोकांनी अर्ज केले. कारण ताणें जांचे कडल्यान पयशे पुंजायल्ले ते गांवांत रावपी अडाणी लोक. तांकां अर्ज करूंक कशें कळटलें? तशे आमी खंयूय चार पयशे चड मेळटा म्हूण कळ्ळ्यार थंय गुंतवणूक करतात आनी इल्लेश्या फायद्या खातीर सगळेंच वगडावन बसतात. गोंयकारांक तरी हो अणभव नवो न्ही. हांगा कितल्यो तरी कंपनी आयल्यो आनी आमकां हांयस दाखोवन लुबाडून गेल्यो. इतलेंय आसून आमी कशेच सुदारनात.
सुब्रत रॉय नांवांच्या मनशान सहारा इंडियाच्या नांवान सुमार णव कोटी लोकांक टोपी घाली. सगळ्यांक बेसहारा करून उडयले. फाटलीं साबार वर्सां कोर्ट चालूच आसा. सुब्रत रॉयक बंदखणूय जाली. पूण ती नांवापुरती. साबार वर्सां तो कसल्या तरी निमतान पॅरोलाचेर सुटिल्लोच आसलो. आतांय तो भायर आसलो आनी पयरूच तो संवसाराक अंतरलो. ताणें जें कितें केलें तें आतां विसरपाचें. लोक शेणले. जे कोण आज ना फाल्यां मेळटलें म्हूण आशेर आसले ताणीं विसरून वचपाचें. देशांतले सामान्य जनतेक अशेच कोणतरी फटयतात, लुबाडटात आनी बेसहारा करून उडयतात. सांगूक गेल्यार व्हडली जंत्री जातली. लोकांची जोड जर अशी बुडत रावली जाल्यार आमी अर्थीक महासत्ता जावंक पावतले?
अभयकुमार वेलिंगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
