भांगरभूंय | प्रतिनिधी
नवी दिल्ली, खबरां संस्था ः भारतीय हवामानशास्त्रज्ञ फुडल्या 5 वर्सांत पावस, बर्फांचो पावस आनी जोगला हांचेर नियंत्रण दवरपाक शकतले. मिशन मौसम खाला भारत क्लायमेट स्मार्ट आनी क्लायमेट रेडी जातलो. तशेंच मौसम जीपीटी अॅप सुरू जातलो. हो चॅट जीपीटी सारको अॅप आसा जो वापरप्याक हवामान संबंदीत सगळी म्हायती दितलो. केंद्र सरकारान ह्या मिशनाक 2000 कोटी रुपयांचो निधी मंजूर केला.
पृथ्वी आनी विज्ञान मंत्रालयाचे (MOES) सचीव एम रविचंद्रन हांणी हे येवजणे विशीं म्हायती दिली. सुरवेक कृत्रीम पावस वाडोवन उणो करपाचें काम करतले, अशें तांणी सांगलें. चड पावस पडपाची गरज आसा थंय क्लाउड सीडिंग करतले. 5 वर्सां भितर आमी आर्टिफिशियल वेदर मॉडिफिकेशनाचेर काम करतले. मिशन मौसमा खाला हवामान अदमासाची पद्दत सुदारतले, जाका लागून हवामान अदमासाची अचूकता 5% ते 10% वाडूंक शकता. आदींच अचूक म्हायती मेळ्ळी जाल्यार पावस आडावंक मेळटा अशें एम रविचंद्रन हांणी सांगलें.
‘मिशन मौसमा’चो कितें फायदो जातलो?
ह्या मिशनांतल्यान व्हड पावस, हुंवार, मेघ फुटप, दुकळ आदीं समस्या टाळपाक मेळटल्यो. शेतकी, आपत्ती वेवस्थापन, संरक्षण, विमान येरादारी, उर्जा, उदका संसाधन आनी पर्यटन ह्या सारक्या जायत्या क्षेत्रांक ह्या मिशनाक फायदो जातलो. हाचे खाला अत्याधुनिक सेन्सर्स वापरतले. हाचे वांगडाच नेक्स्ट जनरेशन रडार आनी सॅटेलायट सिस्टिम तैनात करतले. उच्च क्षमताय आशिल्ले सुपरकंप्यूटर वापरतले. जीआयएस आदारीत स्वयंचलीत समर्थीत प्रणाली वापरतले.
ह्या एआय आदारीत अॅपा वयल्यान तुमकां हवामान संबंदीत अचूक म्हायती मेळटली. हाचे वांगडाच शेतकारांक सोपो क्रमांक जारी करतले. ताका डायल करून शेतकार आपल्या वाठाराचो हवामान अदमास घेवंक शकता. ही म्हायती एसएमएस वरवीं मेळटली. जाका लागून स्मार्ट फोन नाशिल्ल्यांक लेगीत ही म्हायती मेळप सोंपें जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
