भांगरभूंय | प्रतिनिधी
नवी दिल्ली, खबरां संस्था ः भारतीय सोशल मिडिया प्लॅटफॉर्म कू (Koo) अॅप चार वर्सां आदीं जे एक्स (ट्विटर) कडेन सर्तक म्हणून सुरू केल्लो. अर्थीक अडचणी आनी बाजारांतल्या उतार- चडावाक लागून आतां तो बंद करपाचें थारायलां. ह्या निर्णयाक लागून कूचो चार वर्सांचो प्रवास आयज थांबता. कू अॅपाचे संस्थापक अप्रमेय राधाकृष्ण आनी मयंक बिदावतका हांणी आयज LinkedIn चेर हे विशीं एक पोस्ट शेअर केला.
चडशे प्लॅटफॉर्म मुखेलपणान इंग्लीश भाशेंत आसात. थंय बहुभास सोशल मिडिया प्लॅटफॉर्म कू हाणें धा भाशांनी आकर्शक इन-अॅप ‘टॉपिक्स’ खाशेलपण सुरू केल्लें. हातूंत हिंदी, बंगाली, मराठी, गुजराती, कन्नड, तमिळ, तेलगू, आसामी, पंजाबी आनी इंग्लीश अशो धा भारतीय भासांचो आस्पाव आशिल्लो आनी अशें करपी ‘कू’ हें पयलें आनी एकमेव प्लॅटफॉर्म (अॅप) आशिल्लें.
‘कू’ चे 21 लाख दिसपट्टे सक्रिय वापरपी
‘कू’ चे चडांत चड सुमार 21 लाख दिसपट्टे सक्रीय वापरपी आशिल्ले आनी म्हयन्याक 1 कोटी वापरपी आशिल्ले. तातूंत 9000 वयर व्हीआयपी आशिल्ले.
कू अॅप कित्याक बंद जालो?
कू अॅप हांणी एक्सेल (Accel) आनी टायगर ग्लोबल (Tiger Global) ह्या गुंतवणुकदारांकडल्यान 60 दशलक्ष डॉलर परस चड पयशे एकठांय केल्ले. पूण अनप्रेडिक्टेबल मार्केट परिस्थिती आनी दीर्घकालीन भांडवल गुंतवणूक प्लॅटफॉर्माक हानिकारक थारली. कंपनी बरी कामगिरी करून जागतीक ब्रँड जावंक शकली ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
