भांगरभूंय | प्रतिनिधी
नवी दिल्ली, खबरां संस्था: सुखोई अपडेट करपा खातीर १.३ लाख कोटी खर्च जातले. लश्करी बळगें आनीक घटमूट करपा खातीर भारत सरकारान नव्या झुजारी विमानाचो ताफ्यांत आसपाव करपाचें थारायलां. संरक्षण मंत्री राजनाथ सिंह हांचे अध्यक्षतेखाला संरक्षण संपादन मंडळान आयतारा ९७ तेजस हलके झुजारी विमान आनी १५६ जड ड्यूटी हेलिकॉप्टर खरेदी करपाक मान्यताय दिल्या. ते प्रमाण सुखोई एसयू-३० झुजारी ताफ्याकूय अपग्रेड करतले. वांगडा रणगाडे, मावंटेड गन सिस्टीम आनी क्षेपणास्त्रांय विकतीं घेतले.
अशे तरेन अद्ययावतीकरण आनी खरेदीचेर वट्ट २.२३ लाख कोटी रुपया खर्च करतले. संरक्षण मंत्रालया प्रमाण तातूंत ९८ टक्के पयशे म्हणल्यार २.२ लाख कोटींची खरेदी देशी स्वरुपाची आसतली. हाका लागून भारतीय संरक्षण उद्देगाक आत्मनिर्भरतायेचें ध्येय साध्य करपाक मजत जातली. तशेंच लायट कॉम्बॅट प्रचंड हेलिकॉप्टराची निर्मिती हिंदुस्तान एरॉनॉटिक्स लिमिटेडान केल्या. ताची उड्डाण शीम संवसारांत सगळ्यांच उंचेली आसा.
४० हजार कोटी रुपयांनी देशी विमानवाहक बोट खरेदी संरक्षण मंत्रालयाची शीर्ष संस्था आशिल्ल्या संरक्षण खरेदी मंडळानूय ह्या देशी विमानवाहक बोटीक तत्वीक मान्यताय दिली. ही पद्दत हिंद म्हासागरांतल्या चीनाच्या चडांत चड आक्रमक वावराचेर नदर दवरपा खातीर सज्ज आसतली. तातूंत सुमार ४० हजार कोटी रुपया खर्च जावपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
