भांगरभूंय | प्रतिनिधी
भारताक 1947 वर्सा स्वातंत्र्य मेळ्ळे उपरांत 15 जानेवारी 1949 दिसा भारतीय सैन्य दळाचे पयले कमांडर इन चीफ के. एम.करिअप्पा हांणी भारतीय सैन्याचो पदभार ब्रिटीश कमांडर इन चीफ फ्रान्सीस बुचर हांचे कडल्यान स्विकारलो. के. एम. करिअप्पा हांचो जल्म कर्नाटकांतल्या कूर्ग ह्या जिल्ह्यांत 1899 वर्सा जालो. 1947 वर्सा पाकिस्ताना बराबर जाल्ल्या झुजांत अस्तंत शिमेर तांणी सैन्याचें फुडारपण केल्लें. 1953 वर्सा ते निवृत्त जाले.
15 जानेवारी ह्या दिसा नवी दिल्लींत सैन्य मुख्यालयांत आनी सैन्याच्या मुखेल कार्यालयांत सैन्याच्यो कवायती जातात. ज्या जवानांनी आपल्या प्राणांचें बलिदान राष्ट्र रक्षणा खातीर दिलां तांकां आर्गां ओंपतात. ह्या दिसा सेना मेडल्स आनी अवार्ड्स दितात. पयलींच्या काळा सावन भारतीय सैन्य दळाची नामना आसा.
1776 वर्सा ब्रिटीश ईस्ट इंडिया कंपनीन सरकाराचे अदीन रावन भारतीय सैन्याची स्थापणूक कोलकातांत केल्ली. भारतीय सैन्य आतां संवसारांतलें सगल्यांत मोटें चौथे सैन्य दळ आसा. आसाम राफयल ही देशांतली सगल्यांत मोटी पॅरामिलिटरी फोर्स आसा. ताची स्थापणूक 1835 वर्सा जाल्ली. भारतीय नौसेना अकॅडमी केरळांतल्या एझिमाला हांगा आसा ही आशियांतली सगल्यांत मोटी नौसेना अकॅडमी आसा.
भारतीय सैन्या कडेन घोडेस्वार रेजिमेंट आसा. संवसारांत अशे तरेच्यो फक्त तिनूच रेजिमेंट आसात. सैन्यांत गुप्तचर विभागाची स्थापणूक 1941 वर्सा जाली. ह्या विभागांत गुप्त वार्ता एकठांय करतात. भारतीय सैन्य दळा कडेन 53 छावण्यो आनी णव सैन्य तळ आसात.
स्वातंत्र्य मेळ्ळे उपरांत भारताक खूबशा झुजांक सामकार वच्चें पडलें. स्वातंत्र्या उपरांत काश्मीरांत पयली सैन्य दळाक कारवाय करची पडली. उपरांत 1962 वर्सा चीना बराबर झूज जालें. 1965, 1971 वर्सा पाकिस्ताना बराबर झूज जालें. 1971च्या झुजांत पूर्व पाकिस्तान हो पाकिस्तानाचो प्रदेश बांगला देश म्हूण स्वतंत्र जालो. ह्या झुजांत भारतीय सैन्यान व्हड कामगिरी केली. पाकिस्तानाच्या 93,000 हजार सैन्याक जनरल नियाझी हांचे सयत शरण येवचें पडलें. दुसऱ्या म्हाझुजा उपरांत एखादें सैन्य शरण येवप हो सगल्यांत मोटो प्रसंग आशिल्लो.
हाचे उपरांत 1999 वर्सा पाकिस्ताना बराबर कारगील झूज जालें. भारतीय सैन्यान संवसारांतलो सगल्यांत उंच पूल बेल पूल हो 1882 वर्सा हिमाचल प्रदेशांतल्या ट्रांस आनी सुरू न्हंयेचे मध्य वाठारांत लडाखाच्या पर्वत रांगेंत उबारलो. सैमीक आपत्ती मदीं जशे भुंयकांप, उटंगाराचो पावस आदीं संकश्टांक भारतीय सैन्यान मोलादीक मजत केल्या. खूबशा संवसारीक पांवड्यारूय शांतताये खातीर युनोच्या आदेशा वेल्यान आमचें सैन्य धाडून दिलां. दिसाचीं 24 वरां आनी वर्सांतले 365 दीस आमचें सैन्य अखंडपणान देशाचे शिमेची राखण करपाचें काम करीत आसता. आयज ह्या सैन्य दिसाच्या 76व्या वर्धापन दिसा निमतान तांच्या कर्तुत्वाक सलाम.
शांताराम वाघ
9623452553
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
