भारतीय वरिश्ठ पत्रकार म्हासंघाची पयली राष्ट्रीय कार्यकारिणी बसका आयज

भांगरभूंय | प्रतिनिधी

पणजी : काश्मीर ते कन्याकुमारीतलें सुमार 70 पत्रकार आयज गोंयांत पावतात. भारतीय वरिश्ठ पत्रकार म्हासंघाच्या पयले राश्ट्रीय मंडळ कार्यकारिणी बसकेचें उक्तावण मुख्यमंत्री डाॅ. प्रमोद सावंत करतले. गोवा सायन्स सेंटरात जावपी हे कार्यावळीक केंद्रीय मंत्री श्रीपाद नायक हाजीर आसतले.
पत्रकार कल्याण, समाजिक सुरक्षा येवजणींचेर हे बसकेंत भासाभास जातली. उक्तावणाच्या उपरांत पत्रकार समाजिक सुरक्षा ह्या विशयाचेर परिशद जातली. स्तंभलेखिका, संपादक सीमा मुस्तफा, गोंय म्हायती संचालक दीपक बांदेकार, गोंय श्रमीक पत्रकार संघटनेचे अध्यक्ष राजतिलक नायक बसकेंत पत्रकारांक समाजिक सुरक्षा कित्याक जाय, कसल्यो समाजिक सुरक्षा येवजणी आसात ती म्हायती दिवपाचे आसात. केरळ, कर्नाटक, दिल्ली, उत्तराखंड तेलंगणातल्या वरिश्ठ पत्रकार, पत्रकार संघटणांचे अध्यक्ष परिशदेंत वांटेकार जातले. भारतीय वरिश्ठ पत्रकार म्हासंघाचे अध्यक्ष संदीप दीक्षित, म्हाचिटणीस एन चेकुट्टी हांणी ही म्हायती दिली.
गोंय पत्रकार कल्याण निधी मंडळाचे संस्थापक वांगडी वरिश्ठ पत्रकार गुरुदास सावळ, सुहासिनी प्रभुगांवकार हांणी बसके विशीं गोंयांत कशी घडोवन हाडली तें सांगतलीं. वरिश्ठ पत्रकार बसकेचे निमंत्रक सुभाष नायक परिशदेची सुरवात करतले.
आयतार 15 मार्चाक राश्ट्रीय मंडळ बसकेचो आरंभ म्हासंघाचो बावटो चडोवन, पणती पेटोवन ओल्ड गोवा जातलो. प्रशासकी वावराची दिका थारावपी म्हासंघाच्या संविधानाचेर म्होर बसकेंत मारतले. झुजनिती, आर्टिफिशल इंटेलिजन्स, डिजिटलायजेशन आनी पत्रकार ह्या विशयाचेर बसकेंत भासाभास जावपाची आसा. केरळांतल्या वरिश्ठ पत्रकार म्हासंघाचे अध्यक्ष अलेक्झांडर सॅम हांच्या फुडारपणाखाला धा पत्रकार बसकेक आयल्यात. तामीळनाडू, तेलंगणा, आंध्र प्रदेस, कर्नाटक, महाराश्ट्र, जम्मू काश्मीर, उत्तराखंड, दिल्ली, ओरिसा तशेंच हेर राज्यांतले वरिश्ठ पत्रकार, फोटोग्राफर, माध्यमांचे प्रतिनिधी बसकेंत वांटो घेतले.
गुगल मीट माध्यमांतल्यान पत्रकार म्हासंघाच्यो म्हयनाळ्यो बसका आतांमेरेन जाल्यो. म्हासंघाची पयली आॅफलायन कार्यकारीणी बसका उक्तावणा उपरांत जातली. वरिश्ठ उपसंपादपी, स्तंभलेखक, खेळां, संस्कृती पत्रकार, संपादपी, लेखक, खबरांकार बसकेंत वांटो घेतले. केरळ वरिश्ठ पत्रकार म्हासंघाच्या यादस्तिकेचें प्रकाशन बसकेंत जातलें.