भांगरभूंय | प्रतिनिधी
कॅनडाचे प्रधानमंत्री जस्टिन ट्रुडो हांणी सत्ताधारी ‘लिबरल पार्टी’चे फुडारपण आनी प्रधानमंत्री पदाचो राजिनामो दिवपाची सोमारा घोशणा केल्ली. मात, ‘लिबरल पार्टी’चो नवो फुडारी नेम मेरेन आपूणच पदाचेर आतलों अशेंय तांणी स्पश्ट केलें. ५३ वर्सां पिरायेचे ट्रुडो २०१५ सावन कॅनडाचे प्रधानमंत्री आसा. तांकां पक्षांतरा खाला वाडपी मतभेद आनी फाटल्यान दोन वर्सां सावन म्हारगायेक लागून देंवपी लोकप्रियता अश्यो समस्या भेकडायतात. मजगतीं ट्रुडो हांचे उपरांत कॅनडाच्या प्रधानमंत्र्या खातीर भारतीय वंशाची अनिता आनंद हांकां मुखेल दावेदार मानतात. अनिता आनंद सध्याच्या कॅनडा सरकारांत येरादारी मंत्री म्हणून कार्यरत आसात. जर अनिता आनंद हांकां कॅनडाच्या प्रधानमंत्र्यांची संद मेळ्ळ्यार ती संवसारभरांतल्या विवीध देशांच्या मुखेल पदार निवड जावपी भारतीय वंशाची ३४ वी व्यक्ती थारतली.
कुटुंबीक फाटभूंय
अनिता आनंद हिचो जल्म २० मे १९६७ दिसा नोव्हा स्कॉशियाच्या केंटविले हांगा जालो. तिच्या पालकांचें नांव सरोज डी. राम आनी एस.व्ही. आनंद अशें आसा. अनिता आनंद हांचे पालक १९६० च्या दसकाचे सुरवातेक भारतांतल्यान कॅनडांत स्थलांतरीत जाल्ले. अनिता आनंद हांणी ऑक्सफर्ड, डलहौसी आनी टोरंटो विद्यापीठांतल्यान राज्यशास्त्रांत पद्वी आनी कायद्याचे पद्व्युत्तर शिक्षण घेतलें.
राजकीय कारकिर्द
सक्रिय राजकारणांत प्रवेश करचे पयलीं, अनिता आनंद हांणी येल लॉ स्कूल आनी टोरंटो विद्यापीठ अश्या प्रतिश्ठीत शिक्षण संस्थांनी शिक्षिका म्हणून कारकिर्द केल्ली. फुडें २०१९त अनिता आनंद हांची राजकीय कारकिर्द सुरू जाली. तेन्ना तांची ओकविले मतदारसंघाची खासदार म्हणून निवड जाल्ली. कोव्हीड काळांत सार्वजनीक सेवा मंत्री म्हणून, तांणी लस, पीपीई किट आनी ऑक्सिजना सयत म्हत्वाचें वैजकी सुविधांची पुरवण सुरळीत करपाक म्हत्वाची भुमिका केल्ली. तांच्या ह्या कामा खातीर अनिता आनंद हांची कॅनडांत तोखणायूय जाल्ली. फुडें २०२१त संरक्षण मंत्री आनी २०२४ त तांकां येरादारी मंत्री म्हणून काम करपाची संद मेळिल्ली.
जस्टिन ट्रुडो हांच्या जाग्यार प्रधानमंत्री म्हणून निवड जाल्यार, अनिता आनंद ही लिबरल पार्टीची पयली बायल आनी कॅनडाच्या भारतीय वंशाची पयली प्रधानमंत्री थारतली. मजगतीं, लिबरल पार्टीकडल्यान आयज मेरेन खंयचेच बायलेक कॅनडाच्या प्रधानमंत्री पदाची संद मेळूंक ना. जर अनिता आनंद हांकां प्रधानमंत्री पदाची संद मेळ्ळ्यार कॅनडाच्या राजकारणांतलो हो एक म्हत्वाचो टप्पो थारतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
