भांगरभूंय | प्रतिनिधी
खावपाचे, पिवपाचे जीनस दर्जेदार आसपाकूच जाय, हें कोणूय मान्य करतलो. तातूंत ते निर्गत करपाचे आसल्यार तांच्या दर्ज्या विशीं कसलीच तडजोड करून उपकारना. पूण, ते जीनस तशे आसतातूच अशें ना. हालींच देशांतल्या दोन सगल्यांत व्हडल्या मसाल्याच्या ब्रॅण्डाच्या कांय मसाल्यांचेर सिंगापूर आनी हाँगकाँगान बंदी घाल्या. तातूंत ‘इथिलीन ऑक्सायडा’ सारकीं किडनाशकां सांपडिल्ल्याचो दावो तांणी केला. भारतांतल्यान पुराय संवसारांत साबार वस्तू, जिनस निर्गत जातात. युरोपांत वचपी पांचशे परस चड जिनसांनी ‘इथिलीन ऑक्सायड’ मेळिल्ल्याचो दावो युरोपान एका अहवालांत केला. चार वर्सां पयलीं युरोपियन युनियनाच्या अन्न सुरक्षा प्राधिकरणान 527 उत्पादनांनी कार्सिनोजेनीक इथिलीन ऑक्सायड सांपडिल्ल्याचें म्हणिल्लें. हे सगले खावपाचे जिनस भारतांतल्यान आयात केल्ले. तशे हेर देशांच्या जिनसांतूय हें किडनाशक मेळिल्लें. जिनस तिगचो म्हूण विदेशी कंपनींनी पसून थंड पेयांनी किडनाशकां घाल्ल्याचे पुरावे आमच्या भारतांत मेळ्ळ्यात. ताचे वयल्यान व्हडले वाद पसून जाल्यात. बंदीय आयल्या.
मसाल्याच्या बंदीची भारत सरकारान बेगोबेग दखल घेतली तें बरें जालें. कारण, सिंगापूर, हाँगकाँगाच्या पावलार हेर देशांनी पावल दवरलें जाल्यार ताचो फटको भारतीय मसाल्याक बसतलो. आतां ‘फसाय’ कडल्यान सरकारान अहवाल मागला. हाचे मुखार सगल्याच मसाल्यांची गुणवत्ता चाचणी करप बंधनकारक केलां… आनी जर दर्जो बाबत आशिल्ल्याचें सिद्ध जालें जाल्यार त्या ब्रॅण्डाचे निर्गतीचेरूय बंदी येतली. पिकाक चिथो येवचो न्हय म्हूण शेतकार इथिलीन रसायन वापरतात. तें पोटांत गेल्यार कॅन्सर जावपाची भिरांत आसता. ताका लागून बऱ्याच देशांनी ताचेर बंदी घाल्या. हे गजालीक 30 वयर वर्सां जाल्यांत. पूण, ह्या काळांत संवसारभरांतल्यान आयात वाडत गेल्ल्यान युरोपियन देश आयात केल्ल्या दरेका जिनसाची कडक तपासणी करतात. सिंगापूर, हाँगकाँगान मसाल्यांचेर बंदी घाली, ती खबर सगल्याक पातळ्ळी. सगल्योच खबरो पातळनात. सिंगापूरा विशीं म्हायती ना, पूण युरोपियन अहवालांत नेमके कसले जिनस भारतांतल्यान आयात केल्यात ताचो उल्लेख आसा. सुको मेवो आनी तिळाचे 313 जिनस (बदाम, पिस्ता… बी), साठ वखदी वनस्पती, मसाले, 48 आहार, अन्ना कडेन संबंदीत जिनस, तर 34 उत्पादनांत तीळ, काळी मिरयां, अश्वगंधा आसा. विशेश म्हणल्यार भलायकेक घातक आशिल्ल्या ह्या जिनसांक ‘ऑरगॅनीक’ अशें बेधडक लेबल आसा. म्हणल्यार सेंद्रीय (रासायनीक न्हय) सारें वापरून घेतिल्लें पीक. रोगप्रतिकार शक्त वाडोवपाचो दावो करपी आयस्क्रीम, मांस, सूप, भाजयो, फळांचोय आस्पाव आसा. हातूंत इथिलीन सांपडटकच शिमे वयल्यानूच 87 उत्पादनां परत धाडलीं. उरिल्लीं बाजारांतल्यान काडपाक लायलीं. खरें म्हणल्यार ही आमच्या देशाक लजेक घालपाची गजाल. जर कोणा उत्पादकान जर हें मुद्दाम केलां जाल्यार ताचेर कारवाय करपाक जाय.
सिंगापूर, हाँगकाँग मसालो प्रकरणांत आतां केंद्र सरकारान अहवाल मागला. आमच्या देशांतल्यान दरवर्सा 15 लाख टन मसाल्याची निर्गत जाता. हो वेवसाय सादारण तीन अब्ज डाॅलरां वयर आसा. म्हणटकच कोणाचे चुकीक वा मस्तेक लागून जर भांगराची तांती दिवपी ही कोंबी मेली जाल्यार आमचे अर्थवेवस्थेक तें कितल्यांक पडटलें, ताची फक्त कल्पना करची. मसालो निर्गतीक लागून देशाक परकी चलन मेळटा, रोजगार मेळटा. शेतकाराक उत्पन्न मेळटा. जर कांय कारणांक लागून गुणवत्ते विशीं प्रस्न उबे रावले जाल्यार निर्गतीचेर परिणाम जावचो ना? तांबडी मिरसांग, आलें, जिरें, हळद, करबील, कोथमीर, लसूण सगल्यांत चड निर्गत जाता. चीन, बांगलादेश, युएई, अमेरिका इतलेच न्हय, तर थंड हवेचे आनी मसालो घालूंक नाशिल्ले जीनस चड खावपी ब्रिटन, फ्रान्स, जर्मनी सारके युरोपी देश पसून मसालो आयात करतात. उत्पादन तिगपाक जाय म्हूण उत्पादक कंपनी किडनाशक वापरता, ही गजाल खरी आसली तरी हाचेर कितें तरी वेगळो उपाय करपाक जाय. आमच्या देशांत विकतात, ते तरी मसाले किडनाशकां विणें आसतात न्हय? वेगळेवेगळे दावे करून गिरायकांक आकर्शीत करप, गुपचूप भितर कितें मिस्तुराद करप, दर्जेदार म्हाल वापरप ना हें, एकवेळ अशिक्षीत गिरायकां मुखार चलत, पूण बारीकसाणेच्या गिरायकांच्या देशांनी हें चलचें ना.
निदान हाचे मुखार भारतीय कंपनींनी सादूर जावन दर्जेदार मसाले आनी हेर जिनस भारताची शीम हुपतले हाचेर बारीक लक्ष दिवचें. नाजाल्यार मसाल्यांचेर हावळ
येवंक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
