भांगरभूंय | प्रतिनिधी
खबरां संस्था
तेलअवीव/तेहरान : इराण- इझ्रायल संघर्शाचे फाटभुंयेर, एलपीजी घेवन वचपी ‘ग्रीन सावी’ हे भारतीय बोटीन स्ट्रेट ऑफ होर्मूज हुपली. हे बोटींत सुमार 46,650 मॅट्रीक टन गॅस आसा. स्ट्रेट ऑफ होर्मूज हुपपी हो भारताचो सातवो टँकर आसा.
सरकारान दिल्लें म्हायती प्रमाण, सध्या आखाती प्रदेशांत 18 भारतीय बोटी आनी सुमार 485 भारतीय तारवटी उपस्थीत आसात. आतां मेरेन 964 परस अदीक भारतीय तारवट्यांक सुरक्षीत मायदेशांत हाडल्यात. मजगतीं, मुंबयच्या इराणी वाणिज्य दूतावासान भारता कडल्या इतिहासीक संबंदांचो उगडास केलो आनी इश्टागत तशेंच सहकार्य वाडोवपाचो उलो मारलो. इराणी वाणिज्य दूतावासान एका सोशल मिडिया पोस्टांत म्हणलां, आमच्या सामायीक इतिहासांत भारत आनी चड करून गुजराताक एक विशेश सुवात आसा. शेंकड्यां आदीं थंयच्या लोकांनी आमच्या लोकांक येवकार दिल्लो.
इराणान उडयलीं अमेरिकेचीं दोन विमानां
इराणान शुक्रारा अमेरिकेचीं दोन झुजां विमानां उडयिल्ल्याचो दावो केला. तातूंतलें एक एफ-35 फायटर जेट आनी दुसरें ए-10 अटॅक अॅरक्राफ्ट आसा. मात खूबश्या मिडिया रिपोर्टांनी दावो केलो, उडयल्लें पयलें फायटर जेट एफ- 35 नासून एफ- 15 ई आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
