भांगरभूंय | प्रतिनिधी
खबरां संस्था
लंडनः इंग्लंडाचे भोंवडेर आशिल्ल्या भारतीय बायल पंगडाक इंग्लंडा आडचे 3 मॅचींचे टी-20 माळेंतले पयले मॅचींत 9 विकेटीनी हार खावची पडली. चेस्टर ली स्ट्रीटाचे रिवसायड स्टेडियमाचेर जाल्ले पयलीं बॅटींग करपी भारतान पयल्या डावांत 7 बाद 132 धांवड्यो केल्यो. इग्लंड पंगडान 1 विकेट ओगडावन 13 ओव्हरींत जैत मेळयलें.
इंग्लंडाची कॅप्टन एमी जोंसान टॉस जिखून पयलीं फिल्डिंग घेतली. भारताच्या स्मृती मंधाना आनी शेफाली वर्मान पयले विकेटी खातीर 30 धांवड्यांची भागिदारी केली. मंधानान 20 बॉलांत 23 धांवड्यो केल्यो. ब्रायोनी स्मिथान ताका एलबीडब्ल्यू केले. शेफालीन 14 धांवड्यो केल्यो. कॅप्टन हरमनप्रीत कौरान डाव साल्वार करपाचो यत्न केलो. मात 15 बॉलांत 3 चौक्यान ताणे 20 धांवड्यो केल्यो. सगल्यांत चड धांवड्यो दीप्ति शर्मान केल्यो. 24 बॉलांत ताणे तीन चौक्यांनी 29 धांवड्यो करून तें नाबाद रावलें. इंग्लंडाची लेग स्पीनर सारा ग्लेनान 23 धांवड्यांत 4 विकेटी घेतल्यो. तें वूमन ऑफ मॅच थारलें.
जैताच्या लक्षाचो फाटलाव करतना इग्लंडाचे ओपनर सोफिया डंकले आनी डेनियल वॉटान पयले विकेटी खातीर 38 बॉलांत 60 धांवड्यो केल्यो. डेनियलान 16 बॉलांत 24 धांवड्यो केल्यो. स्नेह राणान ताका आवट केलें. दुसरे विकेटी खातीर डंकले आनी एलीस कैप्सेन 40 बॉलांत 74 धांवड्यांची भागिदारी करून पंगडाक जैत मेळोवन दिलें. डंकलेन 44 बॉलांत 8 चौके आनी एका सक्यान 61 धांवड्यो केल्यो. एलिसान 20 बॉलांत तीन चौके आनी दोन सक्यांनी 32 धांवड्यो केल्यो.
इंग्लंडाक तीन मॅचीचें हे माळेंत 1-0 अशी आघाडी घेतल्या. दुसरी मॅच 23 सप्टेंबरका आनी तिसरी 15 सप्टेंबराक जातली. 18 सप्टेंबराच्यान तीन वन-डेची माळ सुरू जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
