भांगरभूंय | प्रतिनिधी
खबरां संस्था
हांगझोऊः बांगलादेशाक 8 विकेटींनी हारोवन भारताच्या बायल पंगडान आशियाई खेळां सर्तीतले क्रिकेट सर्तीचे फायनलींत प्रवेश केलो. सोमाराक फायनलींत भारत आनी श्रीलंका पंगडा मदीं किताबी मॅच जातली.
बांगलादेशाच्या बायल पंगडान टॉस जिखून पयलीं बॅटिंग घेतली. मात 51 धांवड्यात तांचो डाव सोपलो. 8.2 ओव्हरींत 2 विकेटी वोगडावन भारतान जैत मेळयलें. फास्ट बॉलर पूजा वस्त्राकरान चार ओव्हीरींत 17 धांवड्यो दिवंन 4 विकेटी घेतल्यो. ताणे एस रानी, शमिमा सुल्तान, एस मोस्तारी आनी रितू मेनीक आवट केले. ताचे बॉलिंगेक लागून बांगलादेश पंगड फकत 51 धांवड्यो करपाक शकलो.
52 धांवड्यांचो फाटलाव करतना भारताची कॅप्टन स्मृती मंधानान (7) आनी शेफाली वर्मान हांणी पयले विकेटी खातीर 19 धांवड्यो केल्यो. जेमिना रॉड्रिग्जान सगल्यांत चड 20 धांवड्यो करून जैतांत म्हत्वाचें योगदान दिलें. 20 ओव्हरीचे मॅचींत बांगलादेशान 17.5 ओव्हरींत 51 ही भारता आड सगल्यांत उणी धांवसंख्या केली. कॅप्टन निगर सुल्तानान 12 धांवड्यो केल्यो. तांच्यो हेर खेळगडी दोन अंकी धांवड्यो करपाक शकल्यो नात.
श्रीलंकाक 6 विकेटींनी जैत
दुसरे सेमीफायनलींत श्रीलंकान पाकिस्तानाक 6 विकेटींनी हारयले. पाकिस्तानान पयलें खेळून 20 ओव्हरींत 9 आवट 75 धांवड्यो केल्यो. श्रीलंकान 16.3 ओव्हरींत 4 गडी वोगडावन 76 धावड्यो करून जैत मेळयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
