भांगरभूंय | प्रतिनिधी
भा रतीय बायलां क्रिकेट विरांगनांनी निमाणें अपेक्षीत असो पराक्रम केलोच. 47 वर्सांची दीर्घ अशी वाट पळयले उपरांत तो इतिहासीक खीण आयलो. भारतीय बायलां क्रिकेट पंगडान पयलेच फावटी संवसारीक करंड उबारलो. भारतीय क्रिकेटीच्या इतिहासांत आनीक एका भांगराच्या पानाची भर पडली. दोन फावटी हातांतल्यान गेल्लो संवसारीक करंड परतून एकदां वच्चो ना हाची दक्षताय हरमनप्रीत कौर हिच्या फुडारपणा खाला भारतीय पंगडान घेतली आनी बायलां क्रिकेट संवसारीक करंडाचेर निमाणें भारताचें नांव भांगराच्या अक्षरांनी कोरांतलें. नवी मुंबयंत डी. वाय. पाटील स्टेडियमार कार्तिकी एकादशीचे रातीं भारतीय बायलांनी हें जैत मेळयले उपरांत देशभर परतून एकदां लोकांनी दिवाळी मनयली. बायलांनी मेळयिल्ल्या ह्या अद्भुत जैताक लागून सभाविकूच पुराय देश खोशयेन न्हावन गेलो. भारतीय बायलांचें हें जैतूच न्हय जाल्यार भारतीय बायलां क्रिकेटीच्या नव्या युगाची ही सुरवात जाल्या अशें हांव म्हणन. बायलां क्रिकेट संवसारांतलो नवो संवसारीक वस्ताद आयतारा मेळ्ळो. ऑस्ट्रेलिया, इंग्लंड आनी न्युझिलॅण्ड हांचे मदींच आतां मेरेन मर्यादीत आशिल्ल्या ह्या संवसारांत भारतीय बायलांनीय अधिकारान आनी दिमाखान प्रवेश केलो आनी हो प्रवेश म्हणल्यार भारतीय बायलां क्रिकेटीच्या नव्या पर्वाची नांदी म्हणची पडटली.
आठ वर्सां आदीं लंडनांतल्या इतिहासीक लॉर्डस् मैदानार फक्त णव धांवड्यो उण्यो पडिल्ल्यान संवसारीक करंड इंग्लंडाचे सुवादीन करून आमकां निरशेवन मायदेशांत परतून येवचें पडलें. उपरांत आठ वर्सां आमकां रावचें पडिल्लें आसलें तरी हो भांगरा खीण रोखडोच भारतीय क्रिकेटींत येतलो हाची गवाय भारतीय बायलांनी तेन्नाच दिल्ली. हो मार्ग तसो कश्टाचोच आशिल्लो. पूण भारतीय बायलांनी तातूंतल्यानूय वाट काडून तेंगशी गांठली आनी क्रिकेटीचो सम्राट म्हूण संवसार आयज आमचे कडेन पळोवंक लागला. आमच्या बायलां पंगडाची ही इतिहासीक कामगिरी भारतीय क्रिकेटी खातीर तशीच अभिमानाची थारची जशी 1983 वर्सा कपील देवाच्या पंगडान इंग्लंडांत लॉर्डस् मैदानार पयलेच फावटी संवसारीक करंड जिखिल्लो. त्या जैतान भारतीय दादल्या क्रिकेटीचो चेरोच बदलून गेल्लो. हें फाटल्या कांय वर्सां सावन सगलो संवसार पळयत आसा. आतां ह्या जैता उपरांत बायलां क्रिकेटीकूय नवी संजिवनी मेळटली आनी आमच्यो क्रिकेट विरांगना दादल्या क्रिकेट खेळगड्यांच्या खांद्याक खांदो लावन भारतीय क्रिकेटीचो डंको संवसारभर पेटयतल्यो अशी आस्त निश्चीतपणान बाळगूं येता.
ह्या संवसारीक जैता उपरांत भारतीय बायलां क्रिकेटीक नवे आयम फावो जाल्यात. फुडल्या वर्सा जावपी टी-20 संवसारीक करंडा खातीर लेगीत भारतीय पंगडाक आतां दावेदार मानतात. 2023 वर्सा भारतान जेन्ना 19 वर्सां खाला बायलांनी संवसारीक करंड जिखिल्लो तेन्नाच ह्या येसाची बुन्याद घाल्ली. भारताचें हें जैत फक्त खेळांतलें येस न्हय, जाल्यार भारतीय स्त्रीशक्तीचो संवसारीक पांवड्यार जाल्लो भव्य असो जयघोश आसा. ह्या जैतान फक्त क्रिकेटीचेंच न्हय जाल्यार भारतीय स्त्रीशक्तीचेंय नवें पर्व सुरू केलां अशें म्हणल्यार चुकीचें थारचें ना. हें जैत फक्त एका सर्तींतलें येस न्हय, जाल्यार भारतीय बायलां क्रिकेटीच्या दीर्घ संघर्शाचो, जिद्दीचो आनी आत्मविस्वासाचो परिणाम आसा. दीर्घ काळा सावन क्रिकेट म्हणल्यार दादल्यांचो खेळ ही धारणा भारतीय समाजांत खोलांत रुजिल्ली. पूण हरमनप्रीत कौराच्या फुडारपणा खाला ह्या चलयांनी ती मानसीक मर्यादा मोडून काडली. तांणी दाखोवन दिलें की कुशळटाय, चिकाटी आनी आत्मविस्वास हांकां लिंगभेदाची फास्की लागू जायना.
मुळांतूच ही सर्त भारतीय बायलां पंगडा खातीर सोंपी नाशिल्ली, सुरवेच्या कांय मॅचींनी अपेस आयिल्लें. चुकिल्ल्यो संदी आनी वाडटें चेपण हाका लागून पंगडा मुखार प्रस्न उबो राविल्लो. पूण जे पद्दतीन खेळगड्यांनी परिस्थितीक तोंड दिलें, ती तांची खरी जिद्द दाखोवपी गजाल थारली. शफाली वर्मान तिच्या आक्रमक बॅटिंगेन विरोधक लेगीत पळयतूच उरले. स्मृती मंधानान तांत्रीक खेळाची शाळा घातली. जाल्यार दीप्ती शर्माच्या स्पीन बॉलिंगेन मॅच भारता वटेन आयली. भारताच्या दादल्या पंगडांतले शर्मा आनी वर्मा हे खेळगडे प्रतिस्पर्धी पंगडा खातीर सदांच तकलीफोड जाल्ल्याचें चित्र आमी सदांच पळयतात. बायलां पंगडातूय शर्मा-वर्मा ह्याच नांवाच्या खेळगड्यांनी हो भार उबारचो हो योगायोग म्हणचो पडटलो. दीप्ती आनी शफाली तेंच काम भारतीय बायलां पंगडांतल्यान करीत आसात. हरमन आनी जेमिमा रॉड्रिग्स हांचो उल्लेख केलो ना जाल्यार तो आमचेर अन्याय जातलो. सगलेच मॅच विनर आशिल्ल्यान सांघीक कामगिरींतल्यानूच हें सगलें साध्य जालां. संघभावनेचो बरो संगम जाल्ल्याचें दिसून आयलें आनी तीच खूब व्हड उपलब्धी थारली.
हें जैत बायलां क्रिकेटी खातीर नवें पर्व घेवन आयलां. एका काळार थोड्याशा प्रेक्षकां सामकार खेळपी मॅची आतां हावसफुल्ल स्टेडियमांत जायत आसात. प्रसारमाध्यमां, प्रायोजक आनी चाहत्यांचें लक्ष आतां बायलां क्रिकेटी कडेन वळ्ळां. भारतीय क्रिकेट नियामक मंडळान फाटल्या कांय वर्सांत घेतिल्ल्या सकारात्मक निर्णयांचो येसस्वी परिणामूय हातूंतल्यान दिसून येता. समान मॅच फी, बायलां आयपीएल सर्त, वेवसायीक कोचींग सुविधा आनी गांवगिऱ्या वाठारांतल्यान वयर सरपी खेळगड्यां खातीर अकॅडमी. पूण ह्या संवसारीक जैता उपरांत अपेक्षा आनीक वाडल्यात. आतां देशभरांत बायलां क्रिकेटी खातीर चडांत चड सुविधांनी भरिल्लीं केंद्रां उबारप आनी चलयांक खेळांत वांटेकार जावपा खातीर प्रेरीत करप गरजेचें थारतलें. हें जैत भारतीय बायलां क्रिकेटीच्या विकासाची सुरवात आसा.
बीसीसीआयन आतां दीर्घकालीन नियोजन करून देशभर प्रशिक्षण केंद्रां, शाळा पांवड्या वेल्यो सर्ती आनी गांवगिऱ्या वाठारांत संधी निर्माण करप गरजेचें आसा. ह्या जैताचें म्हत्व फक्त खेळां पुरतेंच मर्यादीत ना. हें येस भारतीय समाजांतल्या बायलांच्या सक्षमीकरणाचें प्रतीक आसा. क्रिकेटी सारक्या दादल्यांचें वर्चस्व आशिल्ल्या मळार भारतीय बायलांनी स्वताचें अधिराज्य सिद्ध केलां. तांच्या दरेक शॉट्सान, दरेक विकेटीन आनी दरेक उत्साहान समाजाक एक संदेश दिला- की बायलां संद मेळत जाल्यार खंयच्याय मळार संवसार जिखूंक शकतात. ह्या जैतान ल्हान गांवांतल्या, शाळा-म्हाविद्यालयांतल्या चलयांक नवें सपन दिलां. आतां पालक आपल्या चलयांक बॅट हातांत घेवन मैदानार देंवपाक प्रोत्साहीत करतले. हो बदल भारतीय समाजाच्या मानसीकतायेंत जाल्लें सगल्यांत व्हड जैत म्हणचें पडटलें. हो प्रवास आमकां शिकयता की येस हें एका खिणाचें फळ नासता, तें खूबशा वर्सांच्या प्रयत्नांचें, त्यागाचें आनी न थांबपी जिद्दीचें परिणाम आसता. ह्या जैता उपरांत आतां भारतीय बायलां क्रिकेट पंगडाचेर अदीक जापसालदारकी आसा. संवसारांतलो सर्वोत्कृश्ट पंगड म्हणून सेगीत राखप, नव्या खेळगड्यांक संद दिवप आनी आंतरराष्ट्रीय पांवड्यार वर्चस्व तिगोवन दवरप ही मुखा वेलीं आव्हानां आसतलीं. सरकार, बीसीसीआय आनी राज्य संघटणांनी बायलां क्रिकेटीच्या विकासा खातीर चडांत चड संसाधनांचो वापर करीत जाल्यार फुडलें दसक हें भारतीय बायलां क्रिकेटी खातीर भांगरा यूग थारतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
