भांगरभूंय | प्रतिनिधी
न्यूयॉर्क, खबरां संस्थाः प्रधानमंत्री नरेंद्र मोदी आनी हेर भारतीय फुडाऱ्यांनी अमेरिकेचे आदले अध्यक्ष जो बायडेन हांचे सयत वेगवेगळ्या अमेरिकन फुडाऱ्यांक दिल्ल्या भेट वस्तूंची वळेरी जाहीर जाल्या. ही वळेरी अमेरिकेच्या परराष्ट्र खात्यान जाहीर केल्या. ही वळेरी 2024 वर्साची आसा.
प्रधानमंत्री मोदी हांणी अमेरिकेचे आदले अध्यक्ष जो बायडेन हांकां लांकडी पेटी, स्कार्फ, केशर दवरपाचो जार आनी च्याची लांकडी पेटी भेट दिल्ली. हांची किंमत 562 डॉलर इतली आसा. प्रधानमंत्री मोदी हांणी 16 जुलय 2024 दिसा आदले अध्यक्ष बायडन हांकां दिल्ली आनीक एक भेट म्हळ्यार ‘स्टर्लिंग सिल्व्हर मेटल ट्रेन सेट’. हाची किंमत 7,750 अमेरिकन डॉलर इतली आसा.
हाचे भायर जिल बायडन हांकां प्रधानमंत्री मोदी हांणी 21 ऑक्टोबर 2024 दिसा ‘पश्मीना शाल’ (2969 डॉलर) भेट दिल्ली. तशेंच राष्ट्रीय सुरक्षा सल्लागार अजीत डोवाल हांणी जेकब सुलिव्हन हांकां काश्मीरी पश्मीना स्कार्फ (599 डॉलर) भेट दिल्ली.
अमेरिकेची आदली उपाध्यक्ष कमला हॅरिस हांकां 18 ऑक्टोबर 2024 दिसा मोदी हांणी ‘भगवान श्रीकृष्ण रासलीला सिल्व्हर बॉक्स’ (1330 डॉलर) भेट दिल्ली. ह्यो वस्तू अमेरिकेच्या राष्ट्रीय संग्रहांत दवरल्यांत.
तीन प्राचीन कांस्य शिल्पकृती परत मेळटल्यो
अमेरिका भारताक तीन प्राचीन कांस्य शिल्पकृती परतून दितली. वॉशिंग्टनांतल्या ‘स्मिथसोनियन्स नॅशनल म्युझियम ऑफ एशियन आर्टा’न ही म्हायती दिल्या. तमिळनाडूंतल्या देवळांतल्यान हीं शिल्पकृती बेकायदेशीर काडून घेतिल्ल्यो. तातूंतली एक ‘शिव नटराज’ ह्या रुपांत आसून ती सन 990ची चोल काळांतली आसा. दुसरी शिल्पकृतीय बाराव्या शेंकड्यांत तयार केल्ल्या ‘सोमस्कंद’ प्रकारांतली आसा. आनी तिसरी शिल्पकृती सोळाव्या शेंकड्यांतल्या विजयनगर साम्राज्यांतल्या ‘संत सुंदरर आनी परवई’ हांची आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
