भांगरभूंय | प्रतिनिधी
गूगल इंडिया आनी एनपीसीआय मदीं समंजस कबलात
नवी दिल्ली, खबरां संस्था ः भारतीय पर्यटकांक बेगीनूच गूगल पे वरवीं संवसारभर यूपीआय वेव्हार करपाक मेळटलें. हे खातीर गूगल इंडिया डिजिटल सर्विसेस आनी एनपीसीआय इंटरनॅशनल पेमेंट्स लिमिटेड कंपनीन समंजस कबलात केल्या.
ही समंजस कबलाताक लागून यूपीआयची संवसारीक उपस्थिती घटमूट जातली. परकी वेपाऱ्यांक भारतीय गिरायकां कडेन प्रवेश मेळटलो, जांकां सध्या डिजिटल फारीकणी खातीर फकत विदेशी चलन, क्रेडीट आनी परदेशी चलन कार्डांचेर आदारून रावचें पडचें ना. गूगल पेन एका निवेदनांत म्हणलां, ‘ह्या समंजस कबलाताची तीन मुखेल उद्दिश्टा आसात.
० भारता भायर प्रवास करपाखातीर यूपीआय पेमेंटाचो वापर वाडोवप, जाका लागून तांकां परदेशांत सहज वेव्हार करपाक मेळटले.
० हेर देशांक यूपीआय सारकी डिजिटल पेमेंट प्रणाली स्थापन करपाक मजत करपाचो हेत समंजस कबलातीचो जावन आसा.
० यूपीआय मुळावी सुविधा वापरपी देशांमदीं रेमिटन्साची प्रक्रिया (परकी चलन मेळोवपाचे साधन) सोपी करपाचेर लक्ष केंद्रीत करप, जाका लागून शिमेभायर अर्थीक वेव्हार करपाक सोंपें जातले.
पेमेंट सोंपें, सुरक्षीत करपा खातीर हें एक पावल…
गूगल पे इंडिया पार्टनरशिपाची संचालक दिक्षा कौशल हांणी सांगलें, पेमेंट सोपें, सुरक्षीत आनी सोयीचें करपाच्या आमच्या वचनबद्धते कडेन हें एक पावल. आंतरराष्ट्रीय बाजारांत यूपीआयची पध्दत पावपा खातीर एनआयपीएलाक तेंको दिवपाक आमकां खोस जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
