भारतीय न्याय संहिते सयत तीन विधेयकांक एकमतान मान्यताय

भांगरभूंय | प्रतिनिधी

नवी दिल्ली, खबरां संस्था ः केंद्रीय गृहमंत्री अमित शहा हांणी लोकसभेंत भारतीय न्याय संहिता (एनबीएस-2023), भारतीय नागरी सुरक्षा संहिता (बीएनएसएस-2023) आनी भारतीय साक्ष (बीएस-2023) अशीं तीन विधेयक 1960 वर्सा मांडल्या उपरांत आतां लोकसभेंत तांका एकमतान मान्यताय मेळ्ळी.
अमित शहान हें विधेयक सादर करतना म्हणलें, आमी हातूंतल्यान ब्रिटीश वसाहतवादाचो शिक्को मिटयतात. वेंचणुकेच्या घोशणापत्रांत दिल्लें उतर पुराय करपी पयलें सरकार हें भाजपा फुडारपणाचें सरकार अशें अमित शाहान ह्या संदर्भार सांगलें. आमी कलम 370 फाटीं घेतलो, ईशान्य भारतांतल्या जायत्या राज्यांतल्यान अफ्स्पा (AFSPA) काडून उडयलो, अयोध्यांत राम देवूळ बांदले, तिहेरी तलाक रद्द केलो आनी बायलांक 33 टक्के आरक्षणय दिलें. वयर उल्लेख केल्ली तीनूय विधेयकां अनुक्रमान ब्रिटीश काळांतले भारतीय दंड संहिता (1860), फौजदारी प्रक्रिया संहिता (1882) आनी भारतीय पुरावो कायदो (1872) हांचे सुवातेर येतली.
ब्रिटीश राजवटींत भारतीय दंड विधान संहिता पयलेच खेपे 1860 वर्सा सुरू जाली अशें केंद्रीय गृहमंत्री अमित शहान सांगलें. ही संहिता भारतीयांक ख्यास्त दिवपा खातीर सुरू केल्ली, तातूंत न्यायाचें तत्व नाशिल्लें. हे तिनूय कायदे सुमार 150 वर्सां पोरणें आसात. प्रधानमंत्री नरेंद्र मोदी हांच्या फुडारपणा खाला आमी पयलेच खेपे ह्या नव्या संसद भवनाच्या इमारतींत इतिहासीक पावल उबारतात. भारतीय संविधानान भारताच्या नागरिकांक जे हक्क दिल्ले ते ब्रिटीश फौजदारी प्रक्रियाक लागून मेळप कठीण आशिल्लें. आतां तीन नवे विधेयक आयले उपरांत भारतीय नागरिकांक न्याय मेळपाक मजत जातली आनी तें लेगीत बेगीन.

नव्या कायद्यांतले म्हत्वाचे मुद्दे….

नवे कलम – फौजदारी प्रक्रिया संहितेचे सुवातेर भारतीय नागरी संरक्षण संहितेंत 484 कलम सोडून 533 कलम आसात. णव कलमा वाडयली, जाल्यार 177 कलम दुरुस्त केले. 39 उपकलमांचो आस्पाव करुन कायद्यांत 44 नवे तरतुदी आसात.

बलात्कार, हत्या कलम बदल्ले – बलात्काराक कलम 376 पयलीं आशिल्लो, आतां बलात्काराक कलम 66 आनी 69 आसतलो. जाल्यार हत्ये खातीर कलम 302 बदला कलम 101 आसतलो.

बलात्कार प्रकरण – आतां सावन न्यायवैद्यक शाळेचो अहवाल बलात्कार प्रकरणांत मुखेल भुमिका करतलो. अशा संवेदनशील प्रकरणांची चवकशी नव्या तंत्रगिन्यानाच्या आदारान जातली.

पीडितांक आपले म्हणणें मांडपाचो अधिकार – भारतीय न्याय संहितेंत सुनावणी वेळार पीडितांक आपले म्हणणें मांडपाचो अधिकार दिला. तशेंच पीडितांची बाजू आयकले बगर शून्य एफआयआर फाटीं घेवंक मेळची ना.

राजद्रोहाचो कायदो रद्द – ब्रिटीश काळांत सुरू जाल्लो राजद्रोहाचो कायदो रद्द जाला. हो कलम ब्रिटीशांनी स्वातंत्र्य झुजाऱ्यांक बंदखणींत दवरपा खातीर वापरिल्लो. ताचे बदला आतां देशद्रोहाचो कलम आस्पावला.

हिट अँड रन प्रकरण – हिट अँड रन प्रकरणांत धडक दिवपी मनशान त्या पिडीत मनशाक वेळार हॉस्पिटलांत व्हेल्यार ताची ख्यास्त उणी जातली. पूण धडक दिवन पळून गेलो जाल्यार खर ख्यास्त दितले.

जामीन मेळटलीं – खटल्या वेळार आरोपीन एक तृतीयांश वेळ बंदखणींत काडला जाल्यार तो वा ती जामीन मेळपाक पात्र थारतली.

मॉब लिंचींगाक फांशी – मॉब लिंचींग हो एक नवो प्रकारचो गुन्यांव आनी आतां मेरेन ह्या गुन्यांवांत जायत्या जाणांचो जीव गेला. आतां सावन मॉब लिंचींग करप्यांक मरणाची ख्यास्त दितले.

गैरहाजेरींत खटलो (Trial in Absentia) – आतां सावन आरोपी परदेशांत फरार जालो तरी ताचेर खटलो चालू उरतलो आनी सुनावणी सोंपतकच ताकाय ख्यास्त फर्मायतले.

हाचें फुडें आरोपीक आपली निरपराधीपण सिद्ध करपा खातीर सात दिसां भितर अपील करपाक मेळटलें.